വിദേശ ജോലി വാഗ്ദാനിച്ച് കോടികൾ തട്ടിയ തട്ടിപ്പ്; കൺസൽട്ടൻസി സിഇഒ പിടിയിൽ

വിദേശത്ത് ജോലി വാഗ്ദാനം ചെയ്ത് കോടികൾ തട്ടിയ കേസിൽ ‘ടേക്ക് ഓഫ് ഓവർസീസ് എജ്യൂക്കേഷണൽ കൺസൽട്ടൻസി’യിലെ സിഇഒ കാർത്തിക പ്രദീപ് പോലീസ് പിടിയിലായി . തൃശൂർ സ്വദേശിനിയുടെ പരാതിയിൽ കൊച്ചി സെൻട്രൽ പൊലീസ് കോഴിക്കോട്ടു നിന്നാണ് കാർത്തികയെ കസ്റ്റഡിയിലെടുത്തത്.

നൂറിലേറെ ഉദ്യോഗാർഥികളാണ് ഇവരുടെ തട്ടിപ്പിന് ഇരയായത്. ജർമനി, യുകെ , ആസ്‌ട്രേലിയ തുടങ്ങിയ വിദേശരാജ്യങ്ങളിൽ ജോലി വാഗ്ദാനം ചെയ്തായിരുന്നു ഇവരുടെ തട്ടിപ്പ്. ഉദ്യോഗാർഥികളിൽനിന്ന് 3 മുതൽ 8 ലക്ഷം രൂപ വരെ വാങ്ങിയെന്നാണ് പരാതി. പണവും രേഖകളും നൽകിയതിനു ശേഷവും ജോലി ലഭിക്കാതെ വന്നതോടെയാണ് ഉദ്യോഗാർഥികൾ പൊലീസിനെ സമീപിച്ചത്.

പത്തനംതിട്ട സ്വദേശിനിയായ കാർത്തിക തൃശൂരിലാണ് താമസിക്കുന്നത്. യുക്രെയ്നിൽ ഡോക്ടറാണെന്നാണ് ഇവർ അവകാശപ്പെടുന്നത്. എറണാകുളത്തിന് പുറമേ തിരുവനന്തപുരം, പത്തനംതിട്ട, തൃശൂർ, കോഴിക്കോട് ജില്ലകളിലെ പൊലീസ് സ്‌റ്റേഷനുകളിലും സ്ഥാപനത്തിനെതിരെ പരാതിയുണ്ട്.

കേസായതോടെ കൊച്ചിയിലെ സ്ഥാപനം പൂട്ടി ഇവർ മുങ്ങുകയായിരുന്നു. സ്ഥാപനത്തിന് ലൈസൻസില്ലെന്ന് നേരത്തെ കണ്ടെത്തിയിരുന്നു. കൊച്ചിയിൽ മാത്രം മുപ്പതു ലക്ഷത്തോളം രൂപയാണ് ഇവർ പലരിൽനിന്നായി വാങ്ങിയത്.

ഇതുപോലെ പഠനത്തിന് വിദേശത്ത് കൊണ്ടുപോകാമെന്നും പറഞ്ഞു തട്ടിപ്പ് നടത്തുന്ന സംഘവും സംസ്ഥാനത്ത് തഴച്ചു വളരുന്നു . സ്റ്റഡി അബ്രോടെന്നും പറഞ്ഞു മാധ്യമങ്ങളിൽ ആകർഷകമായ പരസ്യങ്ങൾ നൽകിയാണ് കുട്ടികളെ വല വീശി പിടിക്കുന്നത് .

കാശ് കിട്ടിയാൽ പരസ്യം നല്കാൻ കടയും തുറന്നു വച്ചേക്കുകയാണ് മാധ്യമങ്ങളും , പ്രമുഖ പത്രങ്ങൾ ഇതിന് കൂട്ടുനിൽക്കുന്നത് കാണുമ്പോഴാണ് അതിശയം തോന്നുന്നത് . പണത്തിന് മീതെ പരുന്തും പറക്കില്ലല്ലോ . ഈ പത്രങ്ങൾ തന്നെ കോ സ്പോൺസറായി പരസ്യം ചെയ്തുകൊണ്ടാണ് കുട്ടികളെ വലവീശിപ്പിടിക്കുന്നത് .

ആളുകളുടെ ഇടയിൽ അവർക്കൊരു വിശ്വാസം വരുന്നതിനാണ് മാധ്യമങ്ങളെ കൂടി പണം കൊടുത്ത് കൂടെ ചേർത്ത് വല വീശുന്നത് , ഫ്രീ സെമിനാറിനും പരിശീലന ക്ലാസ്സെന്നുമൊക്കെ പറഞ്ഞു ലക്ഷങ്ങൾ പരസ്യ ഇനത്തിൽ മാധ്യമങ്ങൾക്ക് കൊടുക്കും , അവർ കൂടി ചേർന്നാണ് ഇതൊക്കെ നടത്തുന്നതെന്ന് കാണുമ്പോൾ ആളുകൾ വലയിൽ വീഴും .

ചതിവ് പാട്ടി പരാതിയുമായി വരുമ്പോഴാണ് മാധ്യമങ്ങൾ വെട്ടിലാവുന്നത് , അവർ കയ്യൊഴിയും . അവർ ആരുടെ കയ്യിൽ നിന്നും കാശ് വാങ്ങുന്നില്ലല്ലോ , പക്ഷെ പരസ്യ ഇനത്തിൽ കാശ് കിട്ടിയിട്ടുണ്ടല്ലോ , അവർക്കത് മതി , പരസ്യ ഇനത്തിൽ ചോദിക്കുന്ന തുകയാണ് ഇവന്മാർ പത്രങ്ങൾക്ക് കൊടുക്കുന്നത് .

അതുകൊണ്ട് ഇമ്മാതിരിയുള്ള പരസ്യങ്ങളിൽ ചെന്ന് ചാടി കയ്യിലുള്ള കാശ് പോകാതെ സൂക്ഷിച്ചാൽ ദുഖിക്കേണ്ട .