‘ഒന്ന് ഉമ്മവെച്ചോട്ടെ’ ; പരസ്പരം സ്നേഹ ചുംബനം നൽകി തരുൺ മൂർത്തിയും മോഹൻലാലും

ഗംഭീര അഭിപ്രായമാണ് തരുണ്‍ മൂര്‍ത്തി സംവിധാനം ചെയ്ത് മോഹന്‍ലാല്‍ നായകനായി എത്തിയ ‘തുടരും’ സിനിമയ്ക്ക് ലഭിച്ചുകൊണ്ടിരിക്കുന്നത്. സിനിമ ഇതിനകം തിയേറ്ററുകളില്‍ നിന്ന് 100 കോടിയിലധികം രൂപയാണ് നേടിയിരിക്കുന്നത്. ഇപ്പോള്‍ സിനിമയുടെ അണിയറപ്രവര്‍ത്തകര്‍ ഭാഗമായ തുടരും വിജയാഘോഷ പരിപാടിയുടെ വീഡിയോ വൈറലായിരിക്കുകയാണ്.

മോഹന്‍ലാലും തരുണ്‍ മൂര്‍ത്തിയും സിനിമയുടെ തിരക്കഥാകൃത്ത് കെ ആര്‍ സുനിലും നിര്‍മാതാവ് എം രഞ്ജിത്തും ചിപ്പിയും ഇവര്‍ക്ക് പുറമെ സംവിധായകന്‍ സത്യന്‍ അന്തിക്കാട്, നിര്‍മാതാവ് ആന്റണി പെരുമ്പാവൂര്‍ തുടങ്ങിയവരും പരിപാടിയില്‍ പങ്കെടുത്തിരുന്നു. സിനിമയുടെ വിജയാഘോഷത്തിനിടയില്‍ തരുണ്‍ മൂര്‍ത്തി മോഹന്‍ലാലിനോട് ‘ലാലേട്ടാ ഒന്ന് ഉമ്മവെച്ചോട്ടെ’ എന്ന് ചോദിക്കുന്നതും തുടര്‍ന്ന് തരുണ്‍ മോഹന്‍ലാലിന് ചുംബനം നല്‍കുന്നതും താരം തിരികെ സ്‌നേഹചുംബനം നല്‍കുന്നതും വീഡിയോയില്‍ കാണാം.

അതേസമയം തുടരും ഇപ്പോള്‍ കേരള ബോക്‌സ് ഓഫീസിലും ചരിത്രം സൃഷ്ടിച്ചിരിക്കുകയാണ്. റിലീസ് ചെയ്ത് എട്ട് ദിവസം പിന്നിടുമ്പോള്‍ സിനിമ കേരള ബോക്‌സ് ഓഫീസില്‍ നിന്ന് 50 കോടി ഗ്രോസാണ് നേടിയിരിക്കുന്നത്. ഇതോടെ അതിവേഗത്തില്‍ കേരള ബോക്‌സ് ഓഫീസില്‍ നിന്ന് 50 കോടി നേടുന്ന സിനിമകളുടെ പട്ടികയില്‍ രണ്ടാം സ്ഥാനത്തെത്തിയിരിക്കുകയാണ് തുടരും. വിജയ് ചിത്രം ലിയോയെ മറികടന്നാണ് സിനിമയുടെ നേട്ടം. ലിയോ 10 ദിവസം കൊണ്ടാണ് കേരളത്തില്‍ നിന്ന് 50 കോടി നേടിയത്. എമ്പുരാന്‍ ആണ് ഈ ലിസ്റ്റില്‍ ഒന്നാമത്. അഞ്ച് ദിവസം കൊണ്ടാണ് എമ്പുരാന്‍ കേരളത്തില്‍ നിന്ന് 50 കോടി നേടിയത്.