ഡ്രൈവിംഗ് സ്കൂൾ ഉടമയിൽ നിന്നും 75000 രൂപ കൈക്കൂലി വാങ്ങി; മൂന്ന് എംവിഡി ഉദ്യോ​ഗസ്ഥർ പിടിയിൽ

തൃശൂർ: തൃശൂരിൽ ഡ്രൈവിംഗ് സ്കൂൾ ഉടമയിൽ നിന്നും വാങ്ങിയ കൈക്കൂലിയുമായി എംവി‍ഡി ഉദ്യോ​ഗസ്ഥർ പിടിയിൽ. ഡ്രൈവിംഗ് ടെസ്റ്റിന് കൈക്കൂലി വാങ്ങിയ എംവിഡി ഉദ്യോ​ഗസ്ഥരെ തെളിവ് സഹിതമാണ് വിജിലൻസ് പിടികൂടിയത്. എം വി ഡി ഉദ്യോഗസ്ഥരിൽ നിന്ന് മൊത്തം എഴുപത്തയ്യായിരം രൂപ പിടികൂടിയതായി വിജിലൻസ് പറഞ്ഞു. തൃശൂരിലെ എം വി ഐമാരായ കൃഷ്ണകുമാർ, അനീഷ് എന്നിവരിൽ നിന്നാണ് കൈക്കൂലിയായി വാങ്ങിയ പണം പിടിച്ചെടുത്തത്.

ഡ്രൈവിംഗ് സ്കൂൾ ഉടമയായ ഹരിദാസിന്‍റെ പക്കൽ നിന്ന് ലഭിച്ച കൈക്കൂലി പണമെന്നും കണ്ടെത്തിയതായി വിജിലൻസ് വ്യക്തമാക്കി. ഡ്രൈവിംഗ് ടെസ്റ്റിന് ആളൊന്നിന് 650 രൂപ കൈക്കൂലി വാങ്ങിയെന്നാണ് കണ്ടെത്തൽ. വിജിലൻസ് ഡി വൈ എസ് പി ജിം പോളും സംഘവുമാണ് ഡ്രൈവിംഗ് ടെസ്റ്റ് നടക്കുന്നതിന് സമീപത്ത് നിന്നായി ഇവരെ പിടികൂടിയത്.