ഐപിഎല്ലിൽ ചരിത്രനേട്ടം സ്വന്തമാക്കിയ വൈഭവ് സൂര്യവംശിക്ക് പാരിതോഷികം പ്രഖ്യാപിച്ച് ബിഹാര്‍ സര്‍ക്കാര്‍

പട്‌ന: സവായ് മാന്‍സിങ് സ്റ്റേഡിയത്തില്‍ ചരിത്രം കുറിച്ച പതിനാലുകാരന്‍ വൈഭവ് സൂര്യവംശിക്ക് 10 ലക്ഷം രൂപ സമ്മാനവുമായി ബിഹാര്‍ സര്‍ക്കാര്‍. മുഖ്യമന്ത്രി നിതീഷ് കുമാര്‍ 10 ലക്ഷം രൂപ സമ്മാനമായി പ്രഖ്യാപിച്ചു. 2024ല്‍ വൈഭവ് സൂര്യവംശിക്കൊപ്പം പകര്‍ത്തിയ ഫോട്ടോ സഹിതമാണ് നിതീഷ് കുമാറിന്റെ പോസ്റ്റ്. വൈഭവ് അധികം വൈകാതെ ഇന്ത്യന്‍ ടീമിനായി കളിക്കുമെന്ന പ്രതീക്ഷയും നിതീഷ് കുമാര്‍ പങ്കുവച്ചിട്ടുണ്ട്.

അതെ സമയം ഗുജറാത്ത് ടൈറ്റന്‍സിനെതിരെ രാജസ്ഥാന്‍ റോയല്‍സിന്റെ അത്ഭുതബാലന്റെ സംഹാര താണ്ഡവത്തില്‍ ഞെട്ടിത്തരിച്ചിരിക്കുകയാണ് ക്രിക്കറ്റ് ലോകം. ഐപിഎല്ലിന്റെ ആദ്യ പതിപ്പ് സംഭവിക്കുമ്പോള്‍ ജനിച്ചിട്ട് പോലുമില്ലാത്ത വൈഭവ് അങ്ങനെ ഐപിഎല്ലിന്റെ തന്നെ ചരിത്രമാണ് ഇന്നലെ എഴുതിയത്. രാജ്യാന്തര ട്വന്റി 20യില്‍ സെഞ്ച്വറി നേടുന്ന പ്രായം കുറഞ്ഞ താരം, ഐപിഎല്ലില്‍ വേഗമേറിയ സെഞ്ച്വറി സ്വന്തമാക്കുന്ന ഇന്ത്യന്‍ താരം, ഒരു ഇന്നിങ്‌സില്‍ ഏറ്റവും കൂടുതല്‍ സിക്സറുകള്‍ നേടുന്ന താരം തുടങ്ങി റെക്കോര്‍ഡുകളാണ് കൗമാരക്കാരന്‍ സ്വന്തം പേരിലാക്കിയത്.