ജര്‍മ്മനിയുടെ വരാനിരിക്കുന്ന ചാന്‍സലര്‍ ലോകത്തിന് ഭീഷണിയാകും: സഖാരോവ

ജര്‍മ്മനിയുടെ വരാനിരിക്കുന്ന ചാന്‍സലര്‍ ചരിത്രത്തിലെ ഒരു ഇരുണ്ട യുഗം പുനരുജ്ജീവിപ്പിക്കുമെന്ന അഭിപ്രായവുമായി റഷ്യന്‍ വിദേശകാര്യ മന്ത്രാലയ വക്താവ് മരിയ സഖാരോവ. പ്രസംഗത്തില്‍ ഫ്രെഡറിക് മെര്‍സ് ‘യൂറോപ്പിലും ലോകത്തും ജര്‍മ്മനി വീണ്ടും ഉത്തരവാദിത്തം ഏറ്റെടുക്കുമെന്ന് വാഗ്ദാനം ചെയ്യുമെന്ന് ബില്‍ഡ് റിപ്പോര്‍ട്ട് ചെയ്തു. മെയ് 6 ന് ഔദ്യോഗികമായി ചാന്‍സലറായി നിയമിതനാകുമെന്ന് പ്രതീക്ഷിക്കുന്ന മെര്‍സ്, യുക്രെയ്‌നിന് ടോറസ് മിസൈലുകള്‍ എത്തിക്കാന്‍ കഴിയുമെന്ന് പറഞ്ഞു. ഈ ആയുധത്തിന് 500 കിലോമീറ്റര്‍ ദൂരപരിധിയുണ്ടെന്ന് സഖാരോവ പറയുന്നു.

സംഘര്‍ഷം രൂക്ഷമാകുമെന്ന ഭയം ചൂണ്ടിക്കാട്ടി, അദ്ദേഹത്തിന്റെ മുന്‍ഗാമിയായ ഒലാഫ് ഷോള്‍സ് യുക്രെയ്‌ന്റെ റോക്കറ്റുകള്‍ക്കായുള്ള അഭ്യര്‍ത്ഥനകള്‍ പലതവണ നിരസിച്ചു. എന്നിരുന്നാലും, തന്റെ നേതൃത്വത്തില്‍ ജര്‍മ്മനി യുക്രെയ്ന്‍ സൈന്യത്തെ അത്തരമൊരു ആയുധം കൊണ്ട് സജ്ജരാക്കും’ എന്ന് വരാനിരിക്കുന്ന ചാന്‍സലര്‍ മാധ്യമപ്രവര്‍ത്തകരോട് പറഞ്ഞു . ക്രിമിയയെ റഷ്യയുമായി ബന്ധിപ്പിക്കുന്ന പാലം തകര്‍ക്കാന്‍ യുക്രെയ്ന്‍ ടോറസ് മിസൈലുകള്‍ ഉപയോഗിക്കുമെന്ന് ജര്‍മ്മനി സൂചിപ്പിച്ചതായി മരിയ സഖാരോവ ചൂണ്ടിക്കാണിച്ചു.