പ്രായം വെറും നമ്പർ മാത്രം; 64-ാം വയസില്‍ ടി20 ക്രിക്കറ്റിൽ അരങ്ങേറ്റം കുറിച്ച് ജൊവാന ചൈല്‍ഡ്

ടി20 ക്രിക്കറ്റില്‍ അരങ്ങേറ്റം കുറിക്കുന്ന ഏറ്റവും പ്രായം കൂടിയ രണ്ടാമത്തെ ക്രിക്കറ്റ് താരമെന്ന റെക്കോഡ് സ്വന്തമാക്കി ജൊവാന ചൈല്‍ഡ്. പോര്‍ച്ചുഗീസ് വനിതാ ടി20 ക്രിക്കറ്റ് ടീമിന് വേണ്ടിയായിരുന്നു ഈ സീനിയര്‍ വനിതയുടെ അരങ്ങേറ്റം. ഏപ്രില്‍ ഏഴിന് ആല്‍ബെര്‍ഗേറിയയില്‍ നോര്‍വേക്കെതിരേ കളത്തിലിറങ്ങിയതോടെയാണ് 64 കാരിയായ ജൊവാന ഈ റെക്കോഡ് നേട്ടം സ്വന്തമാക്കിയത്.

62 വര്‍ഷവും 145 ദിവസവും പ്രായമുള്ളപ്പോള്‍ അരങ്ങേറ്റം കുറിച്ച ഫോക്ക്‌ലാന്‍ഡ് ദ്വീപുകളുടെ ആന്‍ഡ്രൂ ബ്രൗണ്‍ലിയെയും 62 വര്‍ഷവും 145 ദിവസവും പ്രായമുള്ളപ്പോള്‍ അരങ്ങേറിയ കൈമന്‍ ദ്വീപുകളുടെ മാലി മൂറിനെയും പിന്നിലാക്കിയാണ് 64 കാരിയായ ജൊവാന പട്ടികയില്‍ രണ്ടാമതെത്തിയത്. 66 വര്‍ഷവും 334 ദിവസവും പ്രായമുള്ളപ്പോള്‍ അരങ്ങേറ്റം കുറിച്ച ജിബ്രാള്‍ട്ടറിന്റെ സാലി ബാര്‍ട്ടണാണ് പട്ടികയിൽ ഒന്നാം സ്ഥാനത്തുള്ളത്.

അതേസമയം, അരങ്ങേറ്റ മത്സരത്തില്‍ പക്ഷേ രണ്ട് റണ്‍സ് മാത്രമാണ് ജൊവാനയ്ക്ക് നേടാന്‍ സാധിച്ചത്. നോര്‍വേയ്‌ക്കെതിരായ പരമ്പരയിലെ എല്ലാ ടി20 മത്സരങ്ങളിലും ജൊവാന കളിച്ചിരുന്നു. പോര്‍ച്ചുഗീസ് വനിതാ ടീമിലെ താരങ്ങളുടെ പ്രായം കൗതുകമുണർത്തുന്ന കാര്യമാണ്. 64 വയസുള്ള ജൊവാനയുടെ കൂടെ കളിക്കുന്നത് പതിനഞ്ച് വയസുകാരി ഇഷ്രീത് ചീമ, പതിനാറ് വയസുകാരി മറിയം വസീം, പതിനാറ് വയസുകാരി അഫ്ഷീന്‍ അഹമ്മദ് എന്നിവരാണ്.