കുവൈത്തിൽ വാഹനങ്ങള്‍ മോഷ്ടിച്ച് പാര്‍ട്‌സുകളാക്കി വില്‍ക്കുന്ന ആറംഗ സംഘം പിടിയിൽ

കുവൈത്തിൽ വിവിധ പ്രദേശങ്ങളില്‍ നിന്ന് നിരവധി വാഹനങ്ങള്‍ മോഷ്ടിച്ച് പാര്‍ട്‌സുകളാക്കി വില്‍ക്കുന്ന ആറംഗ സംഘത്തെ പിടികൂടി. ഈജിപ്ഷ്യന്‍ സ്വദേശികളായ ക്രിമിനല്‍ സംഘത്തെയാണ് അഹമ്മദി കുറ്റാന്വേഷണ വിഭാഗം അറസ്റ്റ് ചെയ്തത്.ക്രിമിനല്‍ സംഘത്തെ കുറിച്ച് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് പ്രതികളെ അതിവിദഗ്ധമായി അന്വേഷണ ഉദ്യോഗസ്ഥര്‍ കസ്റ്റഡിയില്‍ എടുത്തത്.

ഇവര്‍ രാത്രികാലത്തായിരുന്നു വാഹനം മോഷണം നടത്തിയിരുന്നത്. തുറസായ സ്ഥലത്ത് പാര്‍ക്ക് ചെയ്യുന്ന വാഹനങ്ങള്‍ ‘പൊക്കി’ ഇവരുടെ വാഹനത്തില്‍ കടത്തും. തുടര്‍ന്ന് സാല്‍മി പ്രദേശത്ത് മോഷ്ടാക്കളുടെ നിയന്ത്രണത്തിലുള്ള ഗാരേജില്‍ വച്ച് മോഷണ വാഹനങ്ങള്‍ പൊളിച്ചു മാറ്റി പാര്‍ട്‌സുകള്‍ ആക്കി എടുക്കുന്നതായിരുന്നു ഇവരുടെ പതിവ്.