ഇനി അവധിക്കാലം ആഘോഷമാക്കാം, വലിയമട വാട്ടർ ടൂറിസം പാർക്കിലേക്ക് പോന്നോളൂ

കോട്ടയം: അവധിക്കാലം ആസ്വദിക്കാൻ എല്ലാവരും വിനോദ സഞ്ചാര കേന്ദ്രങ്ങൾ തേടി നടക്കുകയാണ്. പ്രകൃതിഭംഗി ആസ്വദിച്ച് ഒരു സായാഹ്നം ചെലവിടാൻ ആരും ആഗ്രഹിക്കും. അത്തരം ഒരിടം, അതും കുറഞ്ഞ നിരക്കിൽ സഞ്ചാരികളെ കാത്തിരിക്കുകയാണ് അയ്മനം ഗ്രാമപഞ്ചായത്തിലെ വലിയമട വാട്ടർ ടൂറിസം പാർക്ക്. അയ്മനത്തും കുമരകത്തും എത്തുന്ന വിനോദ സഞ്ചാരികൾക്കും പ്രദേശവാസികൾക്കും സായാഹ്ന വിനോദങ്ങളിൽ ഏർപ്പെടാനുള്ള മികച്ച അന്തരീക്ഷമാണ് വലിയമട വാട്ടർ ടൂറിസം പാർക്കിൽ ഒരുക്കിയിരിക്കുന്നത്. 4.85 കോടി രൂപ മുടക്കിയാണ് സംസ്ഥാന വിനോദസഞ്ചാര വകുപ്പ് അയ്മനം ഗ്രാമപഞ്ചായത്തിൽ വലിയമട വാട്ടർ പാർക്ക് പൂർത്തീകരിച്ചത്.

അയ്മനം ഗ്രാമപഞ്ചായത്തിന്റെ ഉടമസ്ഥതയിലുള്ള അഞ്ചര ഏക്കർ വിസ്തൃതിയുള്ള വലിയമട കുളം നവീകരിച്ചാണ് വാട്ടർ ഫ്രണ്ട് ടൂറിസം പദ്ധതി നടപ്പാക്കിയത്. കളർ മ്യൂസിക് വാട്ടർ ഫൗണ്ടൻ, ഫ്‌ളോട്ടിം​ഗ് റെസ്റ്റോറന്റ്, ഫ്ളോട്ടിം​ഗ് വാക് വേ, പെഡൽ ബോട്ടിംഗ്, ഫിഷിംഗ്, കുട്ടികൾക്കുള്ള കളിയിടം, പൂന്തോട്ടം, പക്ഷി നിരീക്ഷണം, മ്യൂസിക് ഷോകൾ തുടങ്ങിയവയും ഇവിടെ ഉണ്ട്. കേരളീയ ഭക്ഷണം, ചൈനീസ്, നോർത്ത് ഇന്ത്യൻ ഫുഡ് തുടങ്ങി നിരവധി രുചി ഭേദങ്ങളും ഇവിടെയുണ്ട്. രാത്രി 11 വരെ പാർക്കിൽ പ്രവേശനം ഉണ്ടായിരിക്കും.

പ്രവേശന ഫീസ് 50 രൂപയാണ്. അധികം വിനോദങ്ങൾക്ക് പ്രത്യേകം ഫീസുണ്ട്. കഴിഞ്ഞ ദിവസമാണ് പാർക്കിന്റെ നിർമാണ പ്രവർത്തനങ്ങൾ പൂർത്തിയാക്കിയത്. സംസ്ഥാന വിനോദ സഞ്ചാര വകുപ്പ് പൂർത്തികരിച്ച പാർക്ക് സഹകരണ – തുറമുഖ – ദേവസ്വം വകുപ്പ് മന്ത്രി വി.എൻ വാസവൻ സഞ്ചാരികൾക്കായി തുറന്നു കൊടുത്തു.