കുടുംബത്തോടൊപ്പം കേക്ക് മുറിച്ച് പിറന്നാള്‍ ആഘോഷിച്ച് അല്ലു അര്‍ജുന്‍

പിറന്നാള്‍ കുടുംബത്തോടൊപ്പം ആഘോഷിച്ച് ടോളിവുഡിന്റെ അല്ലു അര്‍ജുന്‍. ഭാര്യയ്ക്കും കുട്ടികള്‍ക്കുമൊപ്പം ലളിതമായ ചടങ്ങില്‍ വീട്ടില്‍ തന്നെയായിരുന്നു അല്ലുവിന്റെ പിറന്നാള്‍ ആഘോഷം. മക്കളായ അല്ലു അര്‍ഹയ്ക്കും അല്ലു അയാനുമൊപ്പം അല്ലു കേക്ക് മുറിക്കുന്ന ചിത്രം ഭാര്യയാണ് പങ്കുവെച്ചത്. സ്‌നേഹയേയും ചിത്രത്തില്‍ കാണാം.

അതേസമയം മലയാളികള്‍ ‘മല്ലു അര്‍ജു’നായി സ്വീകരിച്ച താരത്തിന്റെ പുഷ്പ 2: ദി റൂള്‍ ആണ് അവസാനമായി പുറത്തിറങ്ങിയ ചിത്രം. പിറന്നാള്‍ ദിനത്തില്‍ അല്ലു ആറ്റ്‌ലിയുമായി ഒന്നിക്കുന്ന ചിത്രത്തിന്റെ അനൗണ്‍സ്‌മെന്റ് ഉണ്ടാവുമെന്ന റിപ്പോര്‍ട്ടുകളാണ് പുറത്ത് വരുന്നത്. താരത്തിന് പിറന്നാള്‍ ആശംസകള്‍ നേര്‍ന്ന് സണ്‍ പിക്‌ച്ചേഴ്‌സ് ചെറു വീഡിയോ പങ്കുവെച്ചിരുന്നു. ദിവസങ്ങള്‍ക്ക് മുമ്പാണ് അല്ലുവിന്റെ മകന്‍ അയാന്റെ ജന്മദിനം കുടുംബം ആഘോഷിച്ചത്. അന്നും ഹൈദരാബാദിലെ വീട്ടില്‍ താരജാഡകളില്ലാത്ത പിറന്നാള്‍ ആഘോഷമായിരുന്നു നടന്നത്. ‌

2003-ല്‍ അഭിനയരംഗത്ത് എത്തിയ താരം ഇന്ന് ഇന്ത്യയില്‍ ഏറ്റവും കൂടുതല്‍ പ്രതിഫലം വാങ്ങുന്ന അഭിനേതാക്കളില്‍ ഒരാളാണ്. കെ. രാഘവേന്ദ്ര റാവു സംവിധാനംചെയ്ത ‘ഗംഗോത്രി’യിലൂടെ അഭിനയരംഗത്തെത്തിയ അല്ലു, സുകുമാറിന്റെ കള്‍ട്ട് ക്ലാസിക്കായ ‘ആര്യ’യിലൂടെയാണ് ശ്രദ്ധേയനാവുന്നത്.