കഷ്ടകാലം ഒഴിയുന്നില്ല; പാകിസ്ഥാന്‍ ടീമിനെതിരെ കടുത്ത നടപടിയെടുത്ത് ഐസിസി

ഇസ്ലാമാബാദ്: സ്വന്തം നാട്ടില്‍ നടന്ന ചാമ്പ്യന്‍സ് ട്രോഫിയുടെ ആദ്യ റൗണ്ടില്‍ തന്നെ പുറത്തായ നാണക്കേടിന് പിന്നാലെ ന്യൂസിലന്‍ഡിനെതിരായ ഏകദിന പരമ്പരയും പാകിസ്ഥാന് നഷ്ടമായി. മൂന്ന് മത്സരങ്ങളുള്ള പരമ്പരയില്‍ 2-0ന് പിന്നിലാണ് പാക് പട. ഹാമില്‍ട്ടണിലെ രണ്ടാം ഏകദിനത്തിന് പിന്നാലെ അന്താരാഷ്ട്ര ക്രിക്കറ്റ് കൗണ്‍സിലും (ഐസിസി) പാകിസ്ഥാന്‍ ടീമിനെതിരെ കടുത്ത നടപടി സ്വീകരിച്ചിരിക്കുകയാണിപ്പോള്‍.

കുറഞ്ഞ ഓവര്‍ നിരക്കിന്റെ പേരിലാണ് ഐസിസി നടപടിയെടുത്തിരിക്കുന്നത്. മാച്ച് ഫീയുടെ അഞ്ച് ശതമാനം പിഴ ഒടുക്കേണ്ടിവരും പാകിസ്ഥാന്‍ ടീമിന്. അനുവദിച്ച സമയത്തില്‍ ഒരു ഓവര്‍ പിന്നിലായിരുന്നു പാകിസ്ഥാന്‍. ഐസിസിയുടെ കോഡ് ഓഫ് കണ്ടക്റ്റിലെ ആര്‍ട്ടിക്കിള്‍ 2.22 പ്രകാരമാണ് ഐസിസിയുടെ നടപടിയുണ്ടായിരിക്കുന്നത്.