മദ്യപിച്ചെന്ന് ആരോപിച്ച് കെഎസ്ആര്‍ടിസി ഡ്രൈവർക്ക് നേരെ കയ്യേറ്റം; മൂന്ന് യുവാക്കൾ അറസ്റ്റിൽ

മലപ്പുറം: ഡ്രൈവർ മദ്യപിച്ചിട്ടുണ്ടെന്ന് ആരോപിച്ച് കെഎസ്ആര്‍ടിസി ബസ് തടഞ്ഞ് ഡ്രൈവറെ കയ്യേറ്റം ചെയ്ത യുവാക്കൾ പിടിയിൽ. സംഭവത്തിൽ മൂന്ന് യുവാക്കളെയാണ് പോലീസ് പിടികൂടിയത്. പുത്തൂര്‍ സ്വദേശികളായ സിയാദ്, സിനാന്‍, ഫുഹാന്‍ സെനിന്‍ എന്നിവരാണ് അറസ്റ്റിലായത്.

ഇന്നലെ രാത്രി 11 മണിയോടെ കോട്ടയ്ക്കല്‍ ചങ്കുവെട്ടിയിലാണ് സംഭവം. തൃശൂരില്‍ നിന്ന് കോഴിക്കോട് ഭാഗത്തേക്ക് വരികയായിരുന്നു ബസ്. ചങ്കുവെട്ടിയിലെത്തിയപ്പോള്‍ യുവാക്കൾ ആള്‍ട്ടോ കാറിലെത്തി തടഞ്ഞ് നിര്‍ത്തുകയായിരുന്നു. തുടര്‍ന്ന് ബസ് ക്യാബിനിലേക്ക് കയറി ഡ്രൈവര്‍ മദ്യപിച്ചിട്ടുണ്ടെന്ന് ആരോപിച്ച് മര്‍ദിക്കുകയായിരുന്നു. ചാവി ഊരിയെടുക്കുകയും യാത്രക്കാരെ മുഴുവന്‍ ഇറക്കി വിട്ട ഇവർ ബസിന്റെ ട്രിപ്പ് മുടക്കി.

വിവരമറിഞ്ഞ് സ്ഥലത്തെത്തിയ പോലീസ് ഡ്രൈവർ മദ്യപിച്ചിട്ടുണ്ടോയെന്ന് പരിശോധിച്ചു. എന്നാൽ പ്രാഥമിക പരിശോധനയിൽ തന്നെ ഡ്രൈവർ മദ്യപിച്ചിരുന്നില്ല എന്ന് കണ്ടെത്തി. തുടർന്ന് യുവാക്കൾ വൈദ്യ പരിശോധന നടത്തണമെന്ന് ആവശ്യമുന്നയിച്ചതോടെ അതും നടത്തി. എന്നാൽ മദ്യപിച്ചിരുന്നില്ല എന്ന് തന്നെയായിരുന്നു വീണ്ടും കണ്ടെത്തിയത്. ഇതിന് ശേഷമാണ് യുവാക്കൾക്കെതിരെ പോലീസ് കേസെടുത്തത്. കൃത്യനിര്‍വഹണം തടസപ്പെടുത്തിയതിനും, ഡ്രൈവറെ മർദിച്ചതിനും, ട്രിപ്പ് മുടക്കിയതിനുമാണ് മൂവർക്കുമെതിരെ കേസെടുത്തത്. കോട്ടയ്ക്കൽ പൊലീസാണ് പ്രതികളെ പിടികൂടിയത്.