ബ്രൈറ്റണെ പെനാല്‍റ്റി ഷൂട്ടൗട്ടില്‍ പരാജയപ്പെടുത്തി; നോട്ടിങ്ഹാം ഫോറസ്റ്റ് 34 വര്‍ഷത്തിന് ശേഷം എഫ് എ കപ്പ് സെമിയില്‍

നോട്ടിങ്ഹാം ഫോറസ്റ്റ് എഫ് എ കപ്പ് സെമി ഫൈനലില്‍. ബ്രൈറ്റണെ പെനാല്‍റ്റി ഷൂട്ടൗട്ടില്‍ പരാജയപ്പെടുത്തിയാണ് നോട്ടിങ്ഹാം സെമി ഫൈനലിലേക്ക് മാര്‍ച്ച് ചെയ്തത്. കളിയുടെ മുഴുവന്‍ സമയവും അധിക സമയവും ഗോള്‍ രഹിത സമനിലയായതിന് ശേഷമായിരുന്നു പെനാല്‍റ്റി ഷൂട്ടൗട്ട്. ഷൂട്ടൗട്ടില്‍ ജാക്ക് ഹിന്‍ഷല്‍വുഡിന്റെയും ഡീഗോ ഗോമസിന്റെയും പെനാല്‍റ്റികള്‍ നോട്ടിങ്ഹാം ഗോള്‍ കീപ്പര്‍ മാറ്റ്‌സ് സെല്‍സ് തടഞ്ഞിട്ടു.

എഫ്എ കപ്പിലെ മറ്റൊരു ക്വാര്‍ട്ടര്‍ ഫൈനല്‍ പോരാട്ടത്തില്‍ ക്രിസ്റ്റല്‍ പാലസ് ഫുള്‍ഹാമിനെ തോല്‍പ്പിച്ചു . എതിരില്ലാത്ത മൂന്നുഗോളുകള്‍ക്കാണ് ക്രിസ്റ്റല്‍ പാലസ് ഫുള്‍ഹാമിനെ തോല്‍പ്പിച്ചത്. ക്രിസ്റ്റല്‍ പാലസിന് വേണ്ടി എബെ റെച്ചി എസെ, ഇസ്മായില സെര്‍, എഡി നികേതി എന്നിവര്‍ ഗോള്‍ നേടി. 34 , 38 , 74 മിനിറ്റുകളിലായിരുന്നു ഗോള്‍. എഫ് എ കപ്പിലെ ബാക്കി ക്വാര്‍ട്ടര്‍ ഫൈനല്‍ പോരാട്ടങ്ങള്‍ ഇന്ന് നടക്കും. പ്രെസ്റ്റണ്‍ ആസ്റ്റണ്‍ വിലയേയും മാഞ്ചസ്റ്റര്‍ സിറ്റി ബോണ്‍ മൗത്തിനെയും നേരിടും