സ്പോർട്സ് ആക്ഷൻ ചിത്രം; ഷെയ്ൻ നിഗമിന്റെ പുതിയ സിനിമ ഓണത്തിന് തിയ്യറ്ററിലെത്തും

ഷെയ്ൻ നിഗമും ശാന്ത്നു ഭാഗ്യരാജും പ്രധാന വേഷത്തിൽ എത്തുന്ന ചിത്രത്തിന്റെ റിലീസ് തീയതി പുറത്തുവിട്ടു. ഓഗസ്റ്റ് 27ന് ഓണം റിലീസായി ചിത്രം തീയറ്ററുകളിൽ എത്തും. ചിത്രത്തിന്റെ നിർമ്മാതാവ് സന്തോഷ് ടി കുരുവിള തന്റെ ഫേസ്ബുക്ക് പേജിലൂടെയാണ് റിലീസ് തീയതി പുറത്തുവിട്ടത്. എസ് ടി കെ ഫ്രെയിംസിന്റെ ബാനറിൽ സന്തോഷ്‌ ടി കുരുവിളയും ബിനു അലക്സാണ്ടർ ജോർജും ചേർന്നാണ് ചിത്രം നിർമിക്കുന്നത്.

തമിഴിലെയും തെലുങ്കിലേയും മുൻനിര താരങ്ങൾ അണിനിരക്കുന്ന ഒരു വമ്പൻ ബഡ്ജറ്റിൽ ഒരുങ്ങുന്ന ചിത്രമാണിത്. ഷെയ്ൻ നിഗമിന്റെ പാക്കപ്പ് ഫോട്ടോ ഇപ്പോൾ സോഷ്യൽ മീഡിയയിൽ വൈറലാണ്. സ്പോർട്സ് ആക്ഷൻ മൂഡിൽ ഒരുങ്ങുന്ന ഈ മാസ്സ് എന്റർടെയ്നർ ചിത്രത്തിന്റെ ടൈറ്റിൽ ഇതുവരെ അണിയറ പ്രവർത്തകർ പുറത്തുവിട്ടിട്ടില്ല. ചിത്രത്തിന്റെ സംവിധാനം നിർവഹിച്ചിരിക്കുന്നത് പാലക്കാട് സ്വദേശിയായ ഉണ്ണി ശിവലിംഗമാണ്.

അതേസമയം വമ്പൻ ബഡ്ജറ്റിൽ കബഡിക്കളിയെ കേന്ദ്രീകരിച്ച് ഒരുക്കിയ ചിത്രമാണിത്. ബോക്സിങ് പോലെയുള്ള സ്പോർട്സ് ഇനങ്ങൾ പ്രമേയമായ ചിത്രങ്ങൾ മലയാള സിനിമയിൽ ശ്രദ്ധ നേടിയിരുന്നു. ഇങ്ങനെയുള്ള ഒരു അവസരത്തിലാണ് കബഡിയെ കേന്ദ്രീകരിച്ച് പാൻ ഇന്ത്യൻ തലത്തിൽ ഒരു ചിത്രം വരുന്നത്.