രേഖകളില്ലാതെ ട്രെയിൻ മാർഗം കടത്തിക്കൊണ്ടു വന്ന പണം പിടികൂടി

കൊല്ലം: മതിയായ രേഖകളില്ലാതെ ട്രെയിൻ മാർഗം കടത്തിക്കൊണ്ടുവന്ന പണം പിടികൂടി. കൊല്ലം പുനലൂരിലായിരുന്നു സംഭവം. പുനലൂർ ആർ.പി.എഫും റെയിൽവേ പോലീസും സംയുക്തമായി നടത്തിയ പരിശോധനയിലാണ് അനധികൃതമായി കടത്തിക്കൊണ്ടുവന്ന 44 ലക്ഷം രൂപ പിടിച്ചെടുത്തത്. സംഭവത്തിൽ മധുര സ്വദേശികളായ സുടലൈ മുത്തു, അളകപ്പൻ എന്നിവരാണ് പിടിയിലായത്.

ചെന്നൈ എഗ്മോർ – കൊല്ലം എക്സ്പ്രസിലാണ് പ്രതികൾ കൊല്ലത്ത് എത്തിയത്. പ്ലാറ്റ്ഫോമിൽ രണ്ട് പേരെ സംശയാസ്പദമായ രീതിയിൽ കണ്ടതിനെത്തുടർന്ന് സുരക്ഷാ ഉദ്യോഗസ്ഥർ ഇവരെ പരിശോധിച്ചു. ബെൽറ്റിന്‍റെ മാതൃകയിൽ തുണി തുന്നി പ്രത്യേക അറ ഉണ്ടാക്കി ഇതിനകത്തായിരുന്നു പണം ഒളിപ്പിച്ചത്. ഇത് അരയിൽ കെട്ടിയ നിലയിലായിരുന്നു. രണ്ട് പേരെയും പോലീസ് ചോദ്യം ചെയ്തെങ്കിലും ഇവരുടെ പക്കൽ നിന്നും മറ്റ് വിവരങ്ങളൊന്നും ലഭിച്ചില്ല. ഇരുവരെയും പോലീസ് കസ്റ്റഡിയിലെടുത്തിട്ടുണ്ട്.