വിൽപ്പനയ്ക്കായി വീട്ടിൽ സൂക്ഷിച്ച ചാരായവുമായി വീട്ടമ്മ അറസ്റ്റിൽ

മാന്നാർ: വീട്ടിൽ രഹസ്യമായി സൂക്ഷിച്ച അഞ്ച് ലിറ്റർ ചാരായവുമായി 70വയസുകാരി പിടിയിൽ. വിൽപ്പന നടത്താനായി സൂക്ഷിച്ച ചാരായമാണ് എക്‌സൈസ് സംഘം പിടിച്ചെടുത്തത്. സംഭവത്തിൽ മാന്നാർ കുട്ടൻപേരൂർ മാറാട്ട് തറയിൽ പുത്തൻവീട്ടിൽ രാജേന്ദ്രന്റെ ഭാര്യ മണിയമ്മ എന്ന അംബുജാക്ഷിയാണ് അറസ്റ്റിലായത്. ചെങ്ങന്നൂർ എക്‌സൈസ് സംഘമാണ് ഇവരെ പിടികൂടിയത്.

ചെങ്ങന്നൂർ എക്സൈസ് സർക്കിൾ ഓഫീസിലെ എക്സൈസ് ഇൻസ്പെക്ടർ കെ ബിജുവിന്റെ നേതൃത്വത്തിൽ പ്രിവന്റീവ് ഓഫിസര്‍മാരായ ബി സുനിൽകുമാർ, ബാബു ഡാനിയേൽ, സിവിൽ എക്സൈസ് ഓഫിസര്‍മാരായ ടി കെ രതീഷ്, സിജു പി ശശി, പ്രതീഷ് പി നായർ, കൃഷ്ണദാസ് എന്നിവർ ഉൾപ്പെട്ട സംഘമാണ് പ്രതിയുടെ വീട്ടിൽ റെയ്ഡ് നടത്തിയതും ചാരായം പിടികൂടിയതും. സംഭവത്തിൽ അംബുജാക്ഷിക്കെതിരെ കേസെടുക്കുകയും അറസ്റ്റ് രേഖപ്പെടുത്തുകയും ചെയ്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു