ഇന്റേണല്‍ വിജിലന്‍സ് സ്‌ക്വാഡ് പരിശോധനയില്‍ നാല് സ്ഥാപനങ്ങള്‍ക്ക് 35000 രൂപ പിഴ

തദ്ദേശ സ്വയംഭരണ വകുപ്പിന്റെ ഇന്റേണല്‍ വിജിലന്‍സ് സ്‌ക്വാഡ് മുതുകുളം, മണ്ണഞ്ചേരി എന്നീ ഗ്രാമ പഞ്ചായത്ത് പരിധിയിലെ സ്ഥാപനങ്ങളില്‍ നടത്തിയ പരിശോധനയില്‍ നാല് സ്ഥാപനങ്ങള്‍ക്ക് 35000 രൂപ പിഴ ചുമത്തി.

ഖര ദ്രവമാലിന്യങ്ങളുടെ അശാസ്ത്രീയ സംസ്‌കരണം, പ്ലാസ്റ്റിക് മാലിന്യങ്ങള്‍ അലക്ഷ്യമായ രീതിയില്‍ കൈകാര്യം ചെയ്യല്‍, ഒറ്റത്തവണ ഉപയോഗ പ്ലാസ്റ്റിക് ഉല്‍പ്പന്നങ്ങളുടെ ഉപയോഗം തുടങ്ങിയ നിയമലംഘനങ്ങള്‍ കണ്ടെത്തിയതിന്റെ അടിസ്ഥാനത്തിലാണ് പിഴ ചുമത്തിയത്. അല്‍ നഫൂറ കഫെ 5000, സന ഹോട്ടല്‍ 10000, റഹ്‌മാനിയ 10000, മലബാര്‍ 5000, സാന്‍സ്‌ക്രിറ്റ് ഹയര്‍ സെക്കന്ററി സ്‌കൂള്‍ 5000 രൂപ വീതം പിഴ ഈടാക്കാന്‍ വിജിലന്‍സ് സ്‌ക്വാഡ് ശുപാര്‍ശ ചെയ്തു. 25 സ്ഥാപനങ്ങളില്‍ നടത്തിയ പരിശോധനയില്‍ ഏഴ് സ്ഥാപനങ്ങള്‍ക്ക് നോട്ടീസ് നല്‍കി.സംസ്ഥാനത്തെ സമ്പൂര്‍ണ മാലിന്യ മുക്തമായി മാര്‍ച്ച് 31 ന് പ്രഖ്യാപിക്കുന്നതിന്റെ ഭാഗമായി വരും ദിവസങ്ങളിലും പരിശോധന ശക്തമാക്കുമെന്ന് വിജിലന്‍സ് സ്‌ക്വാഡ് അറിയിച്ചു.