പാലക്കാട്‌ സൂര്യാതപമേറ്റ് ഓട്ടോ ഡ്രൈവർക്ക് പരിക്ക്

പാലക്കാട്: സംസ്ഥാനത്ത് വേനൽ മഴ തുടരുന്നുണ്ടെങ്കിലും പല സ്ഥലങ്ങളിലും കടുത്ത ചൂടും അനുഭവപ്പെടുന്നുണ്ട്. ചെർപ്പുളശ്ശേരിയിൽ സൂര്യാതപമേറ്റ് ഓട്ടോ ഡ്രൈവർക്ക് പരിക്കേറ്റു. പനമണ്ണ അമ്പലവട്ടം വയലാലെ വീട്ടിൽ മോഹനന് (48) ആണ് മുതുകിൽ പൊള്ളലേറ്റത്. തൊലി അടർന്ന നിലയിലാണ്.

കഴിഞ്ഞ ദിവസം ഉച്ചയ്ക്ക് രണ്ടിന് കോതകുർശ്ശിയിലെ വർക് ഷോപ്പ് പരിസരത്ത് വച്ചാണ് സൂര്യാതപമേറ്റത്. ഉടൻ കോതകുർശ്ശിയിലെ സ്വകാര്യ ആശുപത്രിയിൽ ചികിത്സ തേടി. അതേസമയം, സംസ്ഥാനത്ത് അടുത്ത അഞ്ച് ദിവസം മഴ തുടരുമെന്ന് കേന്ദ്ര കാലാവസ്ഥാ വകുപ്പ് അറിയിച്ചു. എല്ലാ ജില്ലകളിലും ഒറ്റപ്പെട്ടയിടങ്ങളിൽ ഇടിമിന്നലോടു കൂടിയ ശക്തമായ മഴയ്‌ക്ക് സാധ്യതയുണ്ടെങ്കിലും ഒരു ജില്ലയിലും പ്രത്യേക അലർട്ട് പ്രഖ്യാപിച്ചിട്ടില്ല