മികച്ച പ്രകടനം പുറത്തെടുക്കാൻ പാകിസ്ഥാന് സാധിച്ചില്ല; ശക്തമായി തിരിച്ചുവരുമെന്ന് പാക്ക് ക്യാപ്റ്റൻ

ന്യൂസിലൻഡിനെതിരായ ഒന്നാം ട്വന്റി 20യിലെ പാകിസ്ഥാന്റെ തോൽ‌വിയിൽ പ്രതികരണവുമായി ക്യാപ്റ്റൻ സൽമാൻ അലി ആ​ഗ. മത്സരത്തിൽ മികച്ച പ്രകടനം പുറത്തെടുക്കാൻ പാകിസ്ഥാന് സാധിച്ചില്ല. ന്യൂസിലൻഡ് മികച്ച രീതിയിൽ പന്തെറിഞ്ഞു. ന്യൂസിലൻഡ് ബൗളർമാർക്ക് മികച്ച സ്വിങ്ങും സീമും ലഭിച്ചിരുന്നു. ഈ മത്സരത്തിലെ പരാജയത്തിൽ നിന്നും പാകിസ്ഥാൻ ക്രിക്കറ്റ് ശക്തമായി തിരിച്ചുവരുമെന്നും സൽമാൻ അലി ആ​ഗ പറഞ്ഞു.

ഒന്നാം ട്വന്റി 20യിൽ ആദ്യം ബാറ്റ് ചെയ്ത പാകിസ്ഥാൻ 18.4 ഓവറിൽ വെറും 91 റൺസിൽ എല്ലാവരും പുറത്തായി. 30 പന്തിൽ 32 റൺസെടുത്ത ഖുഷ്ദിൽ ഷായാണ് പാക് നിരയുടെ ടോപ് സ്കോറർ. ന്യൂസിലൻഡിനായി ജേക്കബ് ഡഫി നാല് വിക്കറ്റുകളും കൈൽ ജാമിസൺ മൂന്ന് വിക്കറ്റുകളും വീഴ്ത്തി.

അതേസമയം 10.1 ഓവറിൽ ഒരു വിക്കറ്റ് നഷ്ടത്തിൽ ന്യൂസിലൻഡ് ലക്ഷ്യംകണ്ടു . 29 പന്തിൽ 44 റൺസെടുത്ത ടിം സെയ്ഫേർട്ടാണ് ന്യൂസിലൻഡ് നിരയിലെ ടോപ് സ്കോറർ. ഫിൻ അലൻ 17 പന്തിൽ പുറത്താകാതെ 29 റൺസും നേടി.