മുരിങ്ങയില കറികൾക്ക് രുചിയില്ലേ; എന്നാൽ ഇങ്ങനെ ഒന്ന് ചെയ്തു നോക്കൂ

പോഷകങ്ങളാൽ സമ്പന്നമാണ് മുരിങ്ങയില. പകർച്ചാവ്യാധികൾ പോലെയുള്ള രോഗങ്ങൾ പിടിമുറുക്കുന്ന ഇക്കാലത്ത് പ്രതിരോധ ശേഷി വർധിപ്പിക്കാൻ സമീകൃതമായ ആഹാരശൈലിയാണ് നല്ലത്. അതിനായി മുരിങ്ങയിലയുടെ നിങ്ങളുടെ ഭക്ഷണക്രമത്തിൽ ഉൾപ്പെടുത്തൂ. അത് കൂടുതൽ രുചികരമാക്കാൻ ഒരു മുട്ട കൂടി ചേർക്കാം.

വേണ്ട ചേരുവകൾ നോക്കാം

മുരിങ്ങയില- 2 കപ്പ്
മുട്ട-2 എണ്ണം
ചുവന്നുള്ളി- 10 എണ്ണം
ഉപ്പ്- ആവശ്യത്തിന്
മഞ്ഞൾപൊടി- 1/2 ടീസ്പൂൺ
മുളകുപൊടി- 1/2 ടീസ്പൂൺ‌
വറ്റൽമുളക് – ആവശ്യത്തിന്
കടുക്- 1/4 ടീസ്പൂൺ
വെളിച്ചെണ്ണ- 2 ടീസ്പൂൺ
തേങ്ങ- 1/4 കപ്പ്

തയ്യാറാക്കുന്ന വിധം

അടികട്ടിയുള്ള ഒരു പാത്രം അടുപ്പിൽ വെച്ച് രണ്ട് ടീസ്പൂൺ എണ്ണയൊഴിച്ച് ചൂടാക്കി കാൽ ടീസ്പൂൺ കടുക് ചേർക്കാം. ഇതിലേക്ക് വറ്റൽമുളക്, പത്ത് ചുവന്നുള്ളി എന്നിവ ചേർത്ത് വഴറ്റാം. രണ്ട് കപ്പ് മുരിങ്ങയില അതിലേയ്ക്ക് ചേർത്ത് വേവിക്കാം. മുരിങ്ങയില വെന്ത് വരുമ്പോൾ കാൽ കപ്പ് തേങ്ങ ചിരകിയതും, അര ടീസ്പൂൺ മഞ്ഞൾപ്പൊടി, അര ടീസ്പൂൺ മുളകുപൊടി, ആവശ്യത്തിന് ഉപ്പ് എന്നിവ ചേർത്തിളക്കി യോജിപ്പിക്കാം. മുരിങ്ങയില നന്നായി വെന്തതിന് ശേഷം രണ്ട് മുട്ട ഇതിലേക്ക് പൊട്ടിച്ചൊഴിക്കാം. നന്നായി ഇളക്കി യോജിപ്പിച്ചോളൂ. മുട്ട വെന്ത് കഴിഞ്ഞ് അടുപ്പിൽ നിന്നും മാറ്റാം. ഇനി കഴിച്ചോളൂ മുരിങ്ങയില തോരൻ റെഡി.