ചാംപ്യന്‍സ് ട്രോഫിയില്‍ മികച്ച പ്രകടനം: ഐസിസി റാങ്കിങില്‍ വിരാട് കോഹ്‌ലിക്ക് കുതിപ്പ്

ചാംപ്യന്‍സ് ട്രോഫിയില്‍  പാകിസ്ഥാനെതിരായ മത്സരത്തിലെ മികച്ച പ്രകടനത്തിലൂടെ ഇന്ത്യന്‍ സൂപ്പര്‍ ബാറ്റര്‍ വിരാട് കോഹ്‌ലി ഐസിസി ഏകദിന ബാറ്റിങ് റാങ്കിങില്‍ ആദ്യ അഞ്ചില്‍ എത്തി. ന്യൂസിലന്‍ഡ് താരം ഡാരില്‍ മിച്ചലിനെ പിന്തള്ളിയാണ് കോഹ്‌ലി പട്ടികയില്‍ മുന്നേറിയത്. പട്ടികയിലുള്ള ആദ്യ ആഞ്ച് പേരില്‍ മൂന്ന് പേര്‍ ഇന്ത്യക്കാരാണ്. ശുഭ്മാന്‍ ഗില്ലാണ് ഒന്നാം സ്ഥാനത്തുള്ളത്. രോഹിത് ശര്‍മ മൂന്നാമതും വിരാട് കോഹ്‌ലി അഞ്ചാമതുമാണുള്ളത്. പാകിസ്ഥാന്‍ താരം ബാബര്‍ അസം ആണ് രണ്ടാം സ്ഥാനത്ത്. നാലാമത് ദക്ഷിണാഫ്രിക്കന്‍ താരം ഹെന്റിച്ച് ക്ലാസനുമാണ്. പട്ടികയില്‍ ആദ്യ പത്തില്‍ ഇന്ത്യന്‍ താരം ശ്രേയസ് അയ്യരും ഇടംപിടിച്ചു.

കെഎല്‍ രാഹുല്‍ പതിനഞ്ചാം സ്ഥാനത്താണ്. ചാംപ്യന്‍സ് ട്രോഫിയിലെ മികച്ച പ്രകടനം പല താരങ്ങളുടെയും പട്ടികയിലെ സ്ഥാനം മെച്ചപ്പെടുത്തി. വില്‍ യംഗ് എട്ട് സ്ഥാനങ്ങള്‍ മെച്ചപ്പെടുത്തി പതിനാലാമത് എത്തി. ഇംഗ്ലണ്ടിനായി സെഞ്ച്വറി നേടിയ ബെന്‍ ഡക്കറ്റ് 27 സ്ഥാനങ്ങള്‍ കയറി 17ാമതായി. ബംഗ്ലാദേശിനെതിരെ സെഞ്ച്വറി നേടിയ രചിന്‍ രവീന്ദ്ര പട്ടികയില്‍ 24ല്‍ എത്തി. ചാംപ്യന്‍സ് ട്രോഫിയില്‍ ഇല്ലാതിരുന്നിട്ടും ശ്രീലങ്കന്‍ ബൗളര്‍ മഹേഷ് തീക്ഷണ ഒന്നാം സ്ഥാനം നിലനിര്‍ത്തി. അഫ്ഗാനിസ്ഥാന്റെ റാഷിദ് ഖാനാണ് രണ്ടാം സ്ഥാനത്ത്. ദക്ഷിണാഫ്രിക്കന്‍ സ്പിന്നര്‍ കേശവ് മഹാരാജ്, ഓസ്ട്രേലിയയുടെ ആദം സാംപ എന്നിവര്‍ റാങ്കിങില്‍ പുരോഗതി കൈവരിച്ചു.