വിനോദസഞ്ചാരകേന്ദ്രങ്ങളിൽ കളരി അഭ്യാസം

ആദികടലായി : കളരിയെ പ്രോത്സാഹിപ്പിക്കുന്നതിനും വിദേശസഞ്ചാരികൾക്ക്‌ പരിചയപ്പെടുത്തുന്നതിനുമായി വിനോദസഞ്ചാരകേന്ദ്രങ്ങളിൽ ‘തട്ടകം’ പരിപാടിക്ക് തുടക്കമായി. നോർത്ത് മലബാർ ടൂറിസം ഓർഗനൈസേഷന്റെ (നോംറ്റോ) നേതൃത്വത്തിലാണ് പരിപാടി.

ആദികടലായി ഹാരിസ് സീഷെൽ ഹോം സ്റ്റേയിൽ പയ്യമ്പള്ളി കളരിസംഘം അവതരിപ്പിച്ച കളരിമുറകൾ സഞ്ചാരികളിൽ ആവേശം സൃഷ്ടിച്ചു. കാനഡ, ന്യൂസീലൻഡ്‌, ഫ്രാൻസ് എന്നിവിടങ്ങളിൽനിന്നുള്ള സഞ്ചാരികൾ കളരി ആസ്വദിക്കാനെത്തിയിരുന്നു.

ജില്ലാ കളരിപ്പയറ്റ് അസോസിയേഷൻ, പയ്യമ്പള്ളി കളരിസംഘം എന്നിവരുടെ സഹകരണത്തോടെയാണ് കളരി അവതരണം. ജനുവരി കളരിയുടെ മാസമായി ആഘോഷിക്കും. ജനവരി 27-ന് പോലീസ് പരേഡ് ഗ്രൗണ്ടിൽ 500 പേരെ പങ്കെടുപ്പിച്ച് കളരിപ്പയറ്റ് പ്രദർശനവും നടത്തും. എല്ലാ വർഷവും പ്രദർശനം നടത്താനും ആലോചനയുണ്ട്.

ജനുവരിയിൽ പല വേദികളിലായി വിദേശസഞ്ചാരികൾക്കായി കളരി അഭ്യാസങ്ങൾ പ്രദർശിപ്പിക്കാനും തീരുമാനിച്ചിട്ടുണ്ടെന്ന് നോംറ്റോ ഭാരവാഹികൾ പറഞ്ഞു