ക്ലാസ് മുറിയിൽ വച്ച് അധ്യാപകരുടെയും സഹപാഠികളുടേയും ചിത്രങ്ങള്‍ രഹസ്യമായി പകർത്തി ടെലിഗ്രാമിലൂടെ വിൽക്കാൻ ശ്രമം; വിദ്യാർഥി അറസ്റ്റിൽ

കോഴിക്കോട്: സഹപാഠികളുടേയും അധ്യാപകരുടെയും ചിത്രങ്ങള്‍ രഹസ്യമായി പകര്‍ത്തി ടെലിഗ്രാമിലൂടെ വിറ്റുവെന്ന പരാതിയില്‍ കോഴിക്കോട്ടെ സ്വകാര്യ സ്ഥാപനത്തിലെ വിദ്യാര്‍ഥി അറസ്റ്റില്‍. തിക്കോടി സ്വദേശിയായ ആദിത്യദേവിനെ കസബ പോലീസ് അറസ്റ്റ് ചെയ്ത് വിട്ടയച്ചു. ക്ലാസ് മുറിയിൽ വച്ചാണ് സഹപാഠികളുടേയും അധ്യാപകരുടേയും ശരീര ഭാഗങ്ങള്‍ ആദിത്യദേവ് അവരറിയാതെ പകര്‍ത്തിയത്.

പകർത്തിയ ചിത്രങ്ങള്‍ ഇയാള്‍ ടെലഗ്രാമിലൂടെ വില്‍ക്കാന്‍ ശ്രമിക്കുകയായിരുന്നു. സംഭവം ശ്രദ്ധയില്‍പെട്ട വിദ്യാര്‍ഥികള്‍ കോളേജ് അധികൃതരെ വിവരം അറിയിക്കുകയായിരുന്നു. തുടര്‍ന്ന് കോളേജ് മാനേജ്‌മെന്റ് കോഴിക്കോട് സൈബര്‍ പൊലീസ് സ്റ്റേഷനിലും കസബ സ്റ്റേഷനിലും പരാതി നല്‍കി. പിന്നാലെ പോലീസ് എഫ്.ഐ.ആര്‍. രജിസ്റ്റര്‍ ചെയ്യുകയായിരുന്നു. വിദ്യാര്‍ഥിയെ സ്ഥാപനത്തില്‍നിന്ന് സസ്പെന്‍ഡ് ചെയ്തതായി മാനേജ്‌മെന്റ് അറിയിച്ചു.