പൂരം കൊടിയേറി മക്കളെ; ഷാജി പാപ്പനും പിള്ളേരും ക്രിസ്മസിന് എത്തും

ജയസൂര്യയെ നായകനാക്കി മിഥുന്‍ മാനുവല്‍ തോമസ് സംവിധാനം ചെയ്ത ആട് സിനിമ പരമ്പരയിലെ മൂന്നാം ചിത്രം പുറത്ത് വരുന്നു. ഒരുപാട് ആരാധകരുള്ള ചലച്ചിത്ര പരമ്പരയാണ് ആട്. കഴിഞ്ഞ വര്‍ഷം ‘ആട് 3 വണ്‍ ലാസ്റ്റ് റൈഡ്’ എന്ന് പേരിട്ട ചിത്രം നിര്‍മ്മാതാക്കളായ ഫ്രൈഡേ ഫിലിം ഹൗസ് പ്രഖ്യാപിച്ചിരുന്നു. എന്നാല്‍ സിനിമയുടെ കാര്യമായ അപ്‌ഡേറ്റുകള്‍ ഒന്നും പുറത്തുവന്നിരുന്നില്ല. എന്നാല്‍ സിനിമയുടെ പ്രീ പ്രൊഡക്ഷന്‍ ആരംഭിച്ചിരിക്കുകയാണ് എന്നാണ് പുതിയ വിവരം.

ആട് 3യുടെ തിരക്കഥ വായിക്കാന്‍ ചിത്രത്തിലെ പ്രധാനപ്പെട്ട താരങ്ങളെല്ലാം ഒത്തുകൂടിയിരിക്കുകയാണ്. സൈജു കുറുപ്പാണ് സോഷ്യല്‍ മീഡിയയിലൂടെ ഈകാര്യം പുറത്തുവിട്ടത്. ”ആട് 3യുടെ നറേഷന്‍ സെക്ഷനിലേക്ക് കടുക്കുകയാണ്. അപ്ഡേറ്റുകള്‍ ഉടന്‍. സോമനും സേവ്യറിനുമൊപ്പം” എന്ന ക്യാപ്ഷനോടെയാണ് സണ്ണി വെയിനും, സുധി കോപ്പയ്‌ക്കൊപ്പമുള്ള ചിത്രം ആട് പരമ്പരയില്‍ അറക്കല്‍ അബുവായി എത്തുന്ന സൈജു പുറത്തുവിട്ടു.

ചിത്രത്തിന്റെ സംവിധായകന്‍ മിഥുന്‍ മാനുവല്‍ തോമസും ഈ ഒത്തുചേരലിന്റെ ചിത്രം പുറത്തുവിട്ടിട്ടുണ്ട്. 2025 ക്രിസ്മസിന് ആട് 3 തീയറ്ററില്‍ എത്തും എന്നാണ് മിഥുന്‍ പോസ്റ്റില്‍ പറയുന്നത്. ഇമ്മിണി വല്യ സ്വപ്നയാത്ര തുടങ്ങുന്നു എന്നാണ് സംവിധായകന്‍ പറയുന്നത്. നിര്‍മ്മാതാവ് വിജയ് ബാബു അടക്കം മിഥുന്‍ പങ്കുവച്ച ചിത്രത്തില്‍ കാണാം.