വഴക്കിനിടെ ഭാര്യയെ കത്രികകൊണ്ട് കുത്തി കൊലപ്പെടുത്തി; പശ്ചാത്താപം അറിയിച്ച് ഭർത്താവിന്റെ സോഷ്യൽ മീഡിയ പോസ്റ്റ്

പൂനെ: വാക്കുതർക്കത്തിനിടെ ഭാര്യയെ കത്രിക കൊണ്ട് കുത്തി കൊലപ്പെടുത്തി യുവാവ്. ജ്യോതി ജീതെയെയാണ് (27) ഭർത്താവായ ശിവദാസ് ജിതെ(37) കുത്തിക്കൊലപ്പെടുത്തിയത്. കൊലപാതക ശേഷം ഇയാൾ തന്റെ തൊഴിലിടത്തെ സമൂഹ മാധ്യമ ഗ്രൂപ്പിൽ മാപ്പ് പറഞ്ഞുകൊണ്ടും പശ്ചാത്താപം പ്രകടിപ്പിച്ചുകൊണ്ടും ഒരു വീഡിയോ പോസ്റ്റ് ചെയ്തു. നിലവിൽ ഇയാളെ പോലീസ് അറസ്റ്റ് ചെയ്തിട്ടുണ്ട്.

മഹാരാഷ്ടയിലെ ഇരുവരും താമസിക്കുന്ന ഒറ്റമുറി വീട്ടിൽ ബുധനാഴ്ച പുലര്‍ച്ചെ നാലരയോടെയാണ് സംഭവം നടന്നത്. ഇരുവരും തമ്മിൽ വഴക്കുണ്ടാകുകയും തർക്കം മൂർച്ഛിക്കുകയും ചെയ്തു പിന്നാലെ ശിവദാസ് കയ്യിൽ കിട്ടിയ കത്രിക കൊണ്ട് ജ്യോതിയുടെ തൊണ്ടയിൽ കുത്തുകയായിരുന്നു. ജ്യോതിയുടെ നിലവിളി കേട്ട് വീട്ടിലെത്തിയ അയൽവാസികൾ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ആശുപത്രിയിൽ എത്തും മുൻപേ തന്നെ ജ്യോതി മരിച്ചിരുന്നതായി ഡോക്ടർമാർ സ്ഥിരീകരിച്ചു.

ഭാര്യ മരിച്ചുവെന്ന് സ്ഥിരീകരിച്ച ശേഷമാണ് കൊലപാതകം നടത്തിയതിൽ ഖേദം പ്രകടിപ്പിച്ചുകൊണ്ട് ശിവദാസ് ഒരു വീഡിയോ സ്വന്തം ഫോണില്‍ ഷൂട്ട് ചെയ്ത്, ഇത് ജോലിയിടത്തെ വാട്‌സാപ്പ് ഗ്രൂപ്പില്‍ പങ്കുവെച്ചു. പിന്നാലെ ആറ് വയസ്സുള്ള മകനൊപ്പം പോലീസ് സ്റ്റേഷനിലെത്തി സ്വയം കീഴടങ്ങി. സംഭവസ്ഥലം സന്ദർശിച്ച പോലീസ് പ്രതി കൊലപാതകത്തിന് ഉപയോഗിച്ച കത്രികയും മറ്റ് തെളിവുകളും ശേഖരിച്ചു.