ചണം ഉത്പന്ന ഫാക്ടറിയിൽ തീപ്പിടിത്തം

ആലപ്പുഴ : ചണം ഉത്പന്ന ഫാക്ടറിയിലുണ്ടായ തീപ്പിടിത്തത്തിൽ ലക്ഷങ്ങളുടെ ഉത്പന്നങ്ങൾ കത്തിനശിച്ചു. ആര്യാട് പഞ്ചായത്ത് 17-ാം വാർഡിൽ തുമ്പോളി ഭാഗത്ത് പ്രവർത്തിക്കുന്ന മാതാ അസോസിയേറ്റ്സ് എന്ന ജൂട്ട് മാറ്റ് ഫിനിഷിങ് യൂണിറ്റിനാണ് തീപിടിച്ചത്. തിങ്കളാഴ്ച രാവിലെ 10.15-ഓടെയാണ് തീപിടുത്തം ഉണ്ടായത്.

സ്ഥാപനത്തിലെ റഗ് ആൻഡ് ജൂട്ട് മാറ്റിനു തീപിടിക്കുകയായിരുന്നു.മോട്ടോർപ്പുരയിൽനിന്നാണ് തീപടർന്നത്. ഷോർട്ട് സർക്യൂട്ടാണു കാരണമെന്നാണ് പ്രാഥമിക നിഗമനം.

തീപ്പിടിത്തമുണ്ടാകുമ്പോൾ ജീവനക്കാർ ചായകുടിക്കാൻ പുറത്തുപോയിരുന്നു. ചണം ഉത്പന്നങ്ങളുമായി വന്ന ലോറി ഡ്രൈവറാണ് തീ പടരുന്ന വിവരം അഗ്നിരക്ഷാസേനയെ അറിയിച്ചത്.ആലപ്പുഴ, ചേർത്തല എന്നിവിടങ്ങളിൽനിന്നായി അഗ്നിരക്ഷാസേനയുടെ നാലുയൂണിറ്റ് മണിക്കൂറുകൾ പരിശ്രമിച്ച് തീയും പുകയും നിയന്ത്രണവിധേയമാക്കി.