കുറ്റിത്താടി മുതൽ കട്ടത്താടി വരെ ഉള്ളവരുടെ സംഗമം പാലക്കാട്

പാലക്കാട്: കുറ്റിത്താടിയും കട്ടത്താടിയും ഉൾപ്പെടെയുള്ള വമ്പൻ താടിക്കാരുടെ സംഗമം പാലക്കാട് നടന്നു. ചെറുതുമുതല്‍ നീണ്ടുകിടക്കുന്ന വമ്പന്‍ താടികള്‍ ഉള്ള പലതരം വ്യതസ്തമായ താടികളുള്ളവർ ഇക്കൂട്ടത്തില്‍ ഉണ്ട്. കേരള ബിയേഡ് സൊസൈറ്റിയുടെ (കെ.ബി.എസ്.) നേതൃത്വത്തില്‍ പാലക്കാട് ചെമ്പൈ കോളേജിലെ എം.ഡി. രാമനാഥന്‍ഹാളില്‍ നടന്ന താടിക്കാരുടെ സംഗമമാണ് വേദി. ‘നോ ഷേവ് നവംബര്‍’ എന്ന കാമ്പയിന്റെ ഭാഗമായിരുന്നു ഈ ഒത്തുചേരല്‍.

800 പേരാണ് സംഘടനയിലുള്ളത്. ഇതില്‍ 300 ഓളം പേര്‍ പങ്കെടുത്തു. സാമൂഹികമാധ്യമപ്രവര്‍ത്തകന്‍ ഫിലിപ്പ് മമ്പാട് സംഗമം ഉദ്ഘാടനംചെയ്തു. കെ.ബി.എസ്. സംസ്ഥാന പ്രസിഡന്റ് ഷഫീഖ് സുലൈമാന്‍ പാവറട്ടി അധ്യക്ഷനായി. ചലച്ചിത്രതാരം നൈറ നിഹര്‍, കെ.ബി.എസ്. സംസ്ഥാന സെക്രട്ടറി അരുണ്‍ പിഴല, സുബൈര്‍ കൊപ്പം തുടങ്ങിയവര്‍ പങ്കെടുത്തു. അര്‍ബുദരോഗികള്‍ക്കുള്ള സഹായവിതരണം, ചക്രക്കസേര വിതരണം, കേശദാനം എന്നിവയും നടന്നു.