കൊല്ലത്ത് ബിവറേജസ് ഔട്ട്ലെറ്റിൽ മോഷണം; കുപ്പി വസ്ത്രത്തിനുള്ളില്‍ ഒളിപ്പിച്ച് കടന്നു

കൊല്ലം: കൊല്ലത്ത് ബിവറേജസ് ഔട്ട്ലെറ്റിൽ നിന്ന് യുവാവ് മദ്യം മോഷ്ടിച്ചു. കൊല്ലം ചാത്തന്നൂരിലെ ഔട്ട്ലെറ്റിലാണ് മോഷണം നടന്നത്. മോഷണ ദൃശ്യം ഔട്ട്ലെറ്റിലെ സിസിടിവിയിൽ പതിഞ്ഞു. ഷെൽഫിൽ നിന്ന് കുപ്പി എടുത്ത ശേഷം വസ്ത്രത്തിനുള്ളില്‍ ഒളിപ്പിച്ച് കടത്തുകയായിരുന്നു. മോഷ്ടാവിനെ തിരിച്ചറിയാനായിട്ടില്ല. നവംബര്‍ 20 നാണ് ബിവറേജസ് ഔട്ട്ലെറ്റിൽ മോഷണം നടന്നത്.

കഴിഞ്ഞ ദിവസം സ്റ്റോക്ക് പരിശോധിച്ചപ്പോൾ ഒരു കുപ്പി മദ്യത്തിന്റെ കുറവ് കണ്ടെത്തി. അതിനെ തുടർന്ന് സിസിടിവി പരിശോധിച്ചപ്പോഴാണ് മോഷണ ദൃശ്യം ജീവനക്കാരുടെ ശ്രദ്ധയില്‍പ്പെട്ടത്. ജീവനക്കാരുടെ പരാതിയില്‍ പൊലീസ് അന്വേഷണം ആരംഭിച്ചിട്ടുണ്ട്. സിസിടിവി ദൃശ്യങ്ങളുടെ അടിസ്ഥാനത്തിലാണ് പരിശോധന.