നിയന്ത്രണംവിട്ട കാർ അപകടത്തിൽപെട്ടു

വൈക്കം : നിയന്ത്രണംവിട്ട കാർ വൈദ്യുതത്തൂണും ബൈക്കും ഇടിച്ചുതകർത്ത് അപകടം. ബുധനാഴ്ച രാത്രി 9.05-ന് വൈക്കം-പൂത്തോട്ട റോഡിൽ ചെമ്പ് മുസ്‌ലിം പള്ളിക്ക് സമീപമാണ് അപകടം ഉണ്ടായത്.

വൈക്കം ഭാഗത്ത് നിന്ന് വന്ന കാർ വൈദ്യുതത്തൂണിൽ ഇടിച്ചശേഷം വഴിയരികിലിരുന്ന ബൈക്കും ഇടിച്ചു തകർക്കുകയായിരുന്നു.അപകടത്തിൽ കാറിന്റെ മുൻഭാഗവും ബൈക്കും തകർന്നു.

ഇടിയുടെ ആഘാതത്തിൽ വൈദ്യുതത്തൂൺ ഒടിഞ്ഞെങ്കിലും കമ്പികൾ പൊട്ടിയില്ല. വിവരം അറിയിച്ചതിനെ തുടർന്ന് കെ.എസ്.ഇ.ബി. വൈദ്യുതിബന്ധം വിച്ഛേദിച്ചു. കാർ അമിത വേഗത്തിലായിരുന്നു എന്ന് നാട്ടുകാർ പറഞ്ഞു.