ഇന്ത്യൻ ഹെഡ് കോച്ച് ഗംഭീറിനെ വാനോളം പുകഴ്ത്തി ബോളിവുഡ് സൂപ്പർതാരം ഷാരുഖ് ഖാൻ

ഷാരൂഖ് ഖാന്റെ പിറന്നാൾ ദിനത്തിൽ ഗംഭീർ എക്‌സിൽ കുറിച്ച കുറിപ്പിന് മൂന്ന് ദിവസത്തിന് ശേഷം മറുപടി നൽകി ഷാരുഖ്. ഗംഭീർ ഒരു ഇൻസ്പിറേഷനാണെന്നും തൻ്റെ നായകൻ ആണെന്നും ഷാരുഖ് ഖാൻ പറഞ്ഞു.’എപ്പോഴും 25 വയസിൽ നിൽക്കുന്നയാൾക്ക് പിറന്നാൾ ആശംസകൾ. നിങ്ങളുടെ എനർജി, ചരിഷ്മ, ചാർമുമെല്ലാം നിങ്ങളുടെ യുവത്വം നിലനിർത്തുന്നു. എപ്പോഴും സ്നേഹം പകർന്നുകൊണ്ടിരിക്കുക.,’ ഷാരൂഖ് ഖാൻ്റെ പിറന്നാളിന് ഗംഭീർ എഴുതിയതാണിത്. ‘എനിക്ക് 25ഓ? അതിലും പ്രായം കുറവാണെന്നാണ് ഞാൻ കരുതിയത്. ഹ..ഹ…നന്ദി ജി.ജി ഒരു വലിയ പ്രചോദനമാകുന്നതിന്, എൻ്റെ ജീവിതത്തിൽ കൊണ്ടുവരുന്ന സത്യസന്ധതക്ക്, എൻ്റെ എക്കാലത്തെയും നായകൻ, ലവ്’യു,’ എന്നായിരുന്നു ഷാരൂഖിന്റെ മറുപടി.

നിലവിൽ ഇന്ത്യൻ ടീമിൻ്റെ ഹെഡ് കോച്ചാണ് ഗൗതം ഗംഭീർ. എന്നാൽ മോശം സമയമാണ് ഗംഭീറിനും ഇന്ത്യൻ ടീമിനും നിലവിലുള്ളത്. കോച്ചായി എത്തിയതിന് ശേഷം ശ്രീലങ്കക്കെതിരെ ഇന്ത്യ ഏകദിന പരമ്പര തോറ്റിരുന്നു. പിന്നീട് സ്വന്തം നാട്ടിൽ ന്യൂസിലാൻഡിനെതിരെ ടെസ്റ്റ് പരമ്പര പൂർണമായി അടിയറവ്’പറയുകയും ചെയ്തത് ഗംഭീറിന് വിനയായിട്ടുണ്ട്. അടുത്തതായി ദക്ഷിണാഫ്രിക്കക്കെതിരെ വരുന്ന ട്വന്റി-20 പരമ്പരയും ആസ്ട്രേലിയക്കെതിരുള്ള ടെസ്റ്റ് പര്യടനവും താരത്തെ പരീക്ഷിക്കുന്നതാവും.

ഷാരുഖിന്റെ ഓണർഷിപ്പിലുള്ള കൊൽക്കത്ത നൈറ്റ് റൈഡേഴ്‌സിൻ്റെ മുൻ നായകനും മെന്ററുമായി ഗംഭീർ ചുമതലയിലുണ്ടായിരുന്നു. ഗംഭീർ നായകനായിരുന്നപ്പോഴായിരുന്നു കെ.കെ. ആർ രണ്ട് കീരീടം നേടിയത്. അദ്ദേഹം മെൻ്ററായി എത്തിയപ്പോൾ ടീമിന് മൂന്നാം ഐ.പി.എൽ ട്രോഫിയും ലഭിച്ചു.