കൊച്ചി:ആമസോണിന്റെ ഇൻഫ്ലുവൻസർ പ്രോഗ്രാമിൽ അംഗങ്ങളായ സ്രഷ്ടാക്കളുടെ എണ്ണം 2 ലക്ഷത്തിലധികമായി ഉയർന്നതായി കമ്പനി ഇന്ന് പ്രഖ്യാപിച്ചു. കഴിഞ്ഞ വർഷത്തെ അപേക്ഷിച്ച് അംഗങ്ങളുടെ എണ്ണം ഇരട്ടിയായിട്ടുണ്ട്. ആമസോൺ ഇന്ത്യയിലും മറ്റ് പ്ലാറ്റ്‌ഫോമുകളിലുമായി ഉള്ളടക്കത്തിലൂടെ ഉൽപ്പന്നങ്ങൾ പരിചയപ്പെടുത്തി വരുമാനം നേടാനും വളർച്ച സാധ്യമാകുന്ന ബിസിനസുകൾ കെട്ടിപ്പടുക്കാനും സ്രഷ്ടാക്കൾക്ക് കൂടുതൽ അവസരങ്ങൾ ഒരുക്കുകയാണ് കമ്പനി. ഇനി യൂട്യൂബിലും പിൻററസ്റ്റിലും പങ്കുവയ്ക്കുന്ന ഉള്ളടക്കങ്ങളിൽ ആമസോൺ ഉൽപ്പന്നങ്ങൾ ഉൾപ്പെടുത്താനും അവയിലൂടെ നടത്തുന്ന യോഗ്യമായ വാങ്ങലുകൾക്ക് കമ്മീഷൻ നേടാനും സ്രഷ്ടാക്കൾക്ക് കഴിയും. ഇതുവഴി രാജ്യത്തുടനീളമുള്ള ദശലക്ഷക്കണക്കിന് ഉപഭോക്താക്കൾക്ക് അനുയോജ്യമായ ഉൽപ്പന്നങ്ങൾ കണ്ടെത്താനും മികച്ച വാങ്ങൽ തീരുമാനങ്ങൾ എടുക്കാനും സാധിക്കും.
ഉപഭോക്താക്കളുടെ ഷോപ്പിംഗ് അനുഭവത്തിൽ സ്രഷ്ടാക്കൾക്ക് നിർണായക പങ്കുണ്ടെന്ന ആമസോണിന്റെ കാഴ്ചപ്പാടിന്റെ ഭാഗമാണ് ഈ നീക്കം. ഉൽപ്പന്നങ്ങളെക്കുറിച്ച് അറിയുന്നതു മുതൽ അവ താരതമ്യം ചെയ്ത് വാങ്ങുന്നതുവരെയുള്ള ഓരോ ഘട്ടത്തിലും സ്രഷ്ടാക്കളുടെ ഉള്ളടക്കം ഉപഭോക്താക്കളെ സ്വാധീനിക്കുന്നു. ഈ വർഷം മാത്രം, ആമസോൺ ഇന്ത്യയിൽ നൂറുകണക്കിന് ദശലക്ഷം ഉൽപ്പന്നങ്ങൾ വാങ്ങാൻ ഏകദേശം 40 ദശലക്ഷം ഉപഭോക്താക്കളെ സ്രഷ്ടാക്കൾ സഹായിച്ചിട്ടുണ്ട്. ഉത്സവകാല ഷോപ്പിംഗിനായി നടക്കുന്ന ആമസോൺ ഗ്രേറ്റ് ഇന്ത്യൻ ഫെസ്റ്റിവലിലൂടെ ഈ മുന്നേറ്റം കൂടുതൽ ശക്തമാകുകയാണ്.
ആമസോണിന്റെ സ്രഷ്ടാക്കൾക്കായുള്ള പരിപാടികളെക്കുറിച്ച് ആമസോണിന്റെ എമർജിങ് മാർക്കറ്റ്‌പ്ലേസസ് വിഭാഗത്തിലെ സോഷ്യൽ കൊമേഴ്‌സ് മേധാവി നിധി ഠാക്കർ പറഞ്ഞു: “ഇന്ന് ഉപഭോക്താക്കൾ ഉൽപ്പന്നങ്ങൾ കണ്ടെത്തുന്നതും അവയെക്കുറിച്ച് അന്വേഷിക്കുന്നതും വാങ്ങൽ തീരുമാനങ്ങൾ എടുക്കുന്നതുമെല്ലാം സ്രഷ്ടാക്കൾ വലിയ രീതിയിൽ സ്വാധീനിക്കുന്നുണ്ട്. ആമസോൺ ഇൻഫ്ലുവൻസർ പ്രോഗ്രാം പോലുള്ള സംരംഭങ്ങളിലൂടെ സ്വന്തം കഴിവുകളും താൽപ്പര്യങ്ങളും വരുമാനമുണ്ടാക്കുന്ന സംരംഭങ്ങളാക്കി മാറ്റാൻ സ്രഷ്ടാക്കളെ ഞങ്ങൾ സഹായിക്കുന്നു. യൂട്യൂബ്, പിൻററസ്റ്റ് തുടങ്ങിയ പങ്കാളികളുമായി ചേർന്ന് രാജ്യത്തിന്റെ എല്ലാ ഭാഗങ്ങളിലുമുള്ള സ്രഷ്ടാക്കൾക്ക് കൂടുതൽ അവസരങ്ങൾ ഒരുക്കാനും ഉപഭോക്താക്കൾക്ക് ഉചിതമായ വാങ്ങൽ തീരുമാനങ്ങൾ എടുക്കാൻ സഹായിക്കാനും ഞങ്ങൾ ആഗ്രഹിക്കുന്നു.”
ഈ പങ്കാളിത്തത്തെക്കുറിച്ച് യൂട്യൂബ് ഇന്ത്യയുടെ മാനേജിംഗ് ഡയറക്ടർ ഗുഞ്ജൻ സോണി പറഞ്ഞു: “യൂട്യൂബിന്റെ ഉൽപ്പന്ന ശുപാർശാ പദ്ധതിയിലേക്ക് ആമസോണിനെ സ്വാഗതം ചെയ്യുന്നതിൽ ഞങ്ങൾക്ക് ഏറെ സന്തോഷമുണ്ട്. ഇന്ത്യയിൽ 450 ദശലക്ഷത്തിലധികം ആളുകൾ യൂട്യൂബിൽ ഷോപ്പിംഗുമായി ബന്ധപ്പെട്ട വിവരങ്ങൾ തിരയുന്നുണ്ട്. ഈ പങ്കാളിത്തത്തിലൂടെ ചെറു വീഡിയോകളിലും ദൈർഘ്യമേറിയ വീഡിയോകളിലും തത്സമയ സംപ്രേഷണങ്ങളിലും ദശലക്ഷക്കണക്കിന് ഉൽപ്പന്നങ്ങൾ സ്രഷ്ടാക്കൾക്ക് എളുപ്പത്തിൽ ഉൾപ്പെടുത്താനാകും. ഇതുവഴി അവരുടെ ശുപാർശകൾ വിശ്വസനീയമായ വരുമാനമാർഗമായി മാറുന്നു. ഏറ്റവും പ്രധാനമായി, വിശ്വസിക്കുന്ന സ്രഷ്ടാക്കൾ നിർദേശിക്കുന്ന ഉൽപ്പന്നങ്ങൾ എളുപ്പത്തിൽ വാങ്ങാനും ആത്മവിശ്വാസത്തോടെ തീരുമാനമെടുക്കാനും ഉപഭോക്താക്കൾക്ക് സാധിക്കും.”
ജീവിതശൈലിയുമായി ബന്ധപ്പെട്ട ഉള്ളടക്കങ്ങൾ പങ്കുവയ്ക്കുന്ന സ്രഷ്ടാവായ ബുധഭൂഷൺ പി. ഖോബരഗഡെ (@thebhushanshow) പറഞ്ഞു: “എന്റെ പ്രേക്ഷകർക്ക് ശരിയായ തീരുമാനങ്ങൾ എടുക്കാൻ സഹായിക്കുക എന്നത് എന്റെ പ്രവർത്തനത്തിന്റെ പ്രധാന ഭാഗമാണ്. ഞാൻ ഉപയോഗിക്കുന്ന ഉൽപ്പന്നങ്ങളെക്കുറിച്ച് പറയുന്നതിലൂടെയും അവയുടെ അനുഭവങ്ങൾ പങ്കുവയ്ക്കുന്നതിലൂടെയും പുതിയ ഉൽപ്പന്നങ്ങൾ പരിചയപ്പെടുത്തുന്നതിലൂടെയും ഞാൻ അതു ചെയ്യുന്നു. ആമസോണിന്റെ പുതിയ സംവിധാനം ഈ പ്രക്രിയ കൂടുതൽ എളുപ്പമാക്കുന്നു. യൂട്യൂബിൽ എന്റെ പ്രേക്ഷകർ കാണുന്ന ഉൽപ്പന്നങ്ങളുമായി എന്റെ ഉള്ളടക്കത്തെ ബന്ധിപ്പിക്കാനും ഒറ്റ സ്പർശത്തിലൂടെയോ ക്ലിക്കിലൂടെയോ ആമസോണിൽ നിന്ന് അവ വാങ്ങാൻ അവരെ സഹായിക്കാനും ഇനി എനിക്ക് കഴിയും.”
ആമസോണിന്റെ കണക്കുകൾ പ്രകാരം, സ്രഷ്ടാക്കളുടെ ശുപാർശകളിലൂടെ ആമസോണിൽ നിന്ന് ഉൽപ്പന്നങ്ങൾ വാങ്ങുന്നവരിൽ ഏകദേശം 70% പേരും മെട്രോ നഗരങ്ങൾക്ക് പുറത്തുള്ള പ്രദേശങ്ങളിൽ നിന്നുള്ളവരാണ്. ഗുണ്ടൂർ, ഡെറാഡൂൺ, ഭുവനേശ്വർ, പട്യാല തുടങ്ങിയ നഗരങ്ങളിലെ ഉപഭോക്താക്കളും ഇതിൽ ഉൾപ്പെടുന്നു. അതുപോലെ, സ്രഷ്ടാക്കളിൽ ഏകദേശം 75% പേരും കാഞ്ചീപുരം, മീററ്റ്, ജമ്മു, നാസിക് തുടങ്ങിയ മെട്രോ ഇതര നഗരങ്ങളിൽ നിന്നുള്ളവരാണ്. ഓരോ സ്രഷ്ടാവിനും ലഭിക്കുന്ന വരുമാനം കഴിഞ്ഞ വർഷത്തെ അപേക്ഷിച്ച് 60% വർധിച്ചിട്ടുണ്ട്. ആമസോണിലൂടെ സുസ്ഥിരമായ വരുമാനവും സംരംഭവളർച്ചയും കൈവരിക്കാനുള്ള സാധ്യതകൾ വർധിക്കുന്നതിന്റെ തെളിവാണിത്.
ആമസോൺ ഇൻഫ്ലുവൻസർ പദ്ധതിയിലൂടെ സ്രഷ്ടാക്കൾക്ക് ഉൽപ്പന്നങ്ങൾ പരിചയപ്പെടുത്തുന്നതിനായി സ്വന്തമായി പേജുകൾ സജ്ജീകരിക്കാനും പ്രത്യേക അനുബന്ധ ലിങ്കുകൾ പങ്കുവയ്ക്കാനും അവയിലൂടെ നടക്കുന്ന യോഗ്യമായ വാങ്ങലുകൾക്ക് കമ്മീഷൻ നേടാനും കഴിയും. സ്രഷ്ടാക്കളുടെ വരുമാനം വർധിപ്പിക്കുന്നതിനായി ആമസോൺ കൂടുതൽ അവസരങ്ങളും ഒരുക്കുന്നു. സ്രഷ്ടാക്കളുടെ പ്രവർത്തനമികവിന് അനുസരിച്ച് പ്രോത്സാഹനങ്ങൾ നൽകുന്ന സംവിധാനമാണ് ക്രിയേറ്റർ റിവാർഡ്സ്. അനുയോജ്യമായ ബ്രാൻഡുകളുടെ പ്രചാരണ പരിപാടികളിൽ പങ്കെടുക്കാനും അധിക വരുമാനം നേടാനും ക്രിയേറ്റർ കണക്ഷൻസ് അവസരമൊരുക്കുന്നു. കൂടാതെ, ക്രിയേറ്റർ സെൻട്രൽ, ക്രിയേറ്റർ യൂണിവേഴ്സിറ്റി എന്നിവയിലൂടെ സ്വന്തം പ്രവർത്തനങ്ങളുടെ ഫലങ്ങൾ വിലയിരുത്താനും ആവശ്യമായ ഉപകരണങ്ങളും പഠനസഹായങ്ങളും നേടാനും സ്രഷ്ടാക്കൾക്ക് സാധിക്കും. ഇതിലൂടെ അവരുടെ കഴിവുകൾ മെച്ചപ്പെടുത്താനും സംരംഭങ്ങൾ വളർത്താനും കഴിയും. നിലവിലുള്ള പ്രേക്ഷകർക്കപ്പുറം കൂടുതൽ ആളുകളിലേക്ക് എത്താൻ ഈ അവസരങ്ങൾ സ്രഷ്ടാക്കളെ സഹായിക്കുന്നു. അതേസമയം, പ്രസക്തമായ ശുപാർശകളിലൂടെയും ഉള്ളടക്കത്തിലൂടെയും ഉപഭോക്താക്കൾക്ക് പുതിയ ഉൽപ്പന്നങ്ങൾ കണ്ടെത്താനും സാധിക്കുന്നു. പദ്ധതിയിൽ ചേരുന്നതിനും കൂടുതൽ വിവരങ്ങൾ അറിയുന്നതിനും ഇവിടെ ക്ലിക്ക് ചെയ്യുക.