‘ജീവിതം മടുത്തു, സ്വയം അവസാനിപ്പിക്കുന്നു’: വനിത ഡോക്ടറുടെ ആത്മഹത്യ കുറിപ്പ്

തിരുവനന്തപുരം: തന്റെ ആത്മഹത്യയ്ക്കു പിന്നിൽ മറ്റാരുമില്ലെന്നും ജീവിതം മടുത്തതിനാൽ സ്വയം അവസാനിപ്പിക്കുകയാണെന്നും ഡോക്ടർ അഭിരാമി(30)യുടെ ആത്മഹത്യാക്കുറിപ്പ്. വെള്ളനാട് സ്വദേശിയായ അഭിരാമി മെഡിക്കൽ കോളജിലെ ഡോക്ടറാണ്. മെഡിക്കൽ കോളജിനടുത്ത് പി.ടി.ചാക്കോ നഗറിലെ ഫ്ലാറ്റിൽ വാടകയ്ക്ക് താമസിക്കുകയായിരുന്നു.

ഇന്നലെ വൈകിട്ട് മുറി തുറക്കാത്തതിനെ തുടർന്ന് സുഹൃത്തുക്കൾ പരിശോധിച്ചപ്പോഴാണ് അഭിരാമിയെ മരിച്ച നിലയിൽ കണ്ടെത്തിയത്. അമിത അളവിൽ മരുന്നു കുത്തിവച്ചതാണ് മരണ കാരണമെന്ന് സംശയിക്കുന്നു. പോസ്റ്റുമോർട്ടത്തിനുശേഷം മൃതദേഹം ബന്ധുക്കൾക്ക് വിട്ടുനൽകും.

‌ഇന്നലെ വൈകുന്നേരം 3 മണിക്കും അഭിരാമി വീട്ടിൽ വിളിച്ചിരുന്നതായി ബന്ധുക്കൾ പറയുന്നു. ദിവസം 3 പ്രാവശ്യമെങ്കിലും മാതാപിതാക്കളെ വിളിക്കാറുണ്ടെന്നും മറ്റു പ്രശ്നങ്ങളുള്ളതായി പറഞ്ഞിരുന്നില്ലെന്നും ബന്ധുക്കൾ പറയുന്നു. ഇന്നലെ വിളിച്ചപ്പോഴും പ്രശ്നങ്ങളുള്ളതായി തോന്നിയില്ലെന്ന് ബന്ധുക്കൾ പറഞ്ഞു. അഞ്ച് മാസം മുൻപാണ് കൊല്ലം സ്വദേശിയായ ഡോക്ടറുമായി വിവാഹം കഴിഞ്ഞത്.