യാത്രക്കാർക്ക് ഉ​ഗ്രൻ ഓഫറുമായി എയർ ഇന്ത്യ എക്സ്പ്രസ്

യാത്രക്കാർക്ക് ഉ​ഗ്രൻ ഓഫറുമായി എയർ ഇന്ത്യ എക്സ്പ്രസ്. ചെക്ക്-ഇൻ ബാഗേജുകൾ ഇല്ലെങ്കിൽ ടിക്കറ്റ് നിരക്കിൽ ഇളവ് നൽകുമെന്ന് എയർ ഇന്ത്യ എക്സ്പ്രസ് അറിയിച്ചു. ആഭ്യന്തര-അന്താരാഷ്‌ട്ര യാത്രകൾക്ക് ഓഫർ ലഭ്യമാണ്. “Xpress Lite” എന്ന പേരിലാണ് വിമാന കമ്പനി ഓഫർ അവതരിപ്പിച്ചിരിക്കുന്നത്. ഇതുപ്രകാരം ചെക്ക്-ഇൻ ബാ​ഗേജ് ഇല്ലാതെ വരുന്ന യാത്രക്കാർക്ക് കാബിൻ ബാ​ഗേജ് ഏഴ് കിലോയിൽ നിന്ന് 10 കിലോ ​ഗ്രാം വരെ കൊണ്ടുപോകാനും അനുമതി ലഭിക്കും.

വിമാനകമ്പനിയുടെ വെബ്സൈറ്റ് വഴിയോ മൊബൈൽ ആപ്പ് മുഖേനയോ ഓഫർ സ്വീകരിക്കാവുന്നതാണ്. വടക്കേ അമേരിക്ക, യൂറോപ്പ്, തെക്കുകിഴക്കൻ ഏഷ്യ എന്നിവിടങ്ങളിൽ നേരത്തെ തന്നെ പല വിമാന കമ്പനികളും നടപ്പിലാക്കിയിട്ടുള്ള രീതിയാണിത്. എയർ ഇന്ത്യ എക്സ്പ്രസ് മുഖേന ഈ രീതിക്ക് ഇന്ത്യയിലും തുടക്കമാവുകയാണ്.