ശ്രീബുദ്ധന്റെയും ശിഷ്യരുടെയും തിരുശേഷിപ്പുകൾ ഒരുമാസത്തേക്ക് ആരാധനയ്ക്കും പ്രദർശനത്തിനുമായി തായ്‌ലൻഡിലേക്ക് അയക്കുന്നു

ദേശീയമ്യൂസിയത്തിൽ സൂക്ഷിച്ചിരിക്കുന്ന ബുദ്ധന്റെ 20 വിശുദ്ധ തിരുശേഷിപ്പുകളിൽ നാലെണ്ണമാണ് തായ്‌ലൻഡിലേക്ക് കൊണ്ടുപോകുന്നത്. ആദ്യമായാണ് ബുദ്ധന്റെയും ശിഷ്യരുടെയും തിരുശേഷിപ്പുകൾ ഒരുമിച്ച് ഒരുരാജ്യത്തേക്ക് അയക്കുന്നത്. ഫെബ്രുവരി 21-ന് തിരുശേഷിപ്പുമായി ഇന്ത്യയിൽനിന്ന് ആരംഭിക്കുന്ന പ്രയാണം തായ്‌ലൻഡിലെ ബാങ്കോക്ക്, ചിയാങ് മായ്, ഉബോൺ റച്ചതാനി, ക്രാബി പ്രവിശ്യകളിൽ പ്രദർശനത്തിനുവെച്ചശേഷം മാർച്ച് 19 -ന് ഇന്ത്യയിൽ തിരികെയെത്തിക്കും. വ്യോമസേനയുടെ സി-17 ഗ്ലോബ് മാസ്റ്ററിലാണ് തിരുശേഷിപ്പുകൾ കൊണ്ടുപോകുക. വൻസുരക്ഷയാണ് ഇവയ്ക്കായി ഒരുക്കിയിരിക്കുന്നത്.