ട്രെയിനിന്റെ എല്ലാ ആവശ്യങ്ങൾക്കും ഇനി ഒറ്റ ആപ്പ്; റെയിൽവൺ എത്തി

തിരുവനന്തപുരം: റെയിൽവേയുമായി ബന്ധപ്പെട്ട എല്ലാ ആവശ്യങ്ങൾക്കും ചോദ്യങ്ങൾക്കും വേണ്ടി കൊണ്ടുവന്ന ആപ്പാണ് സ്വ ആപ്പ്. വിജയകരമായ ട്രയലിന് ശേഷം സ്വ ആപ്പ് പുറത്തിറങ്ങിയിരിക്കുകയാണ്‌. പക്ഷേ, ഇത്തവണ നിരവധി മാറ്റങ്ങളുമായാണ് ആപ്പ് പുറത്തിറങ്ങിയിരിക്കുന്നത്. പേരിൽ തന്നെയാണ് ആദ്യത്തെ മാറ്റം. സ്വ ആപ്പ് ഇനി മുതൽ റെയിൽവൺ ആയിരിക്കും. ഇന്ത്യൻ റെയിൽവേയുടെ റെയിൽവൺ ആപ്പിനെ ‘സൂപ്പർ ആപ്പ്’എന്നാണ് പറയുന്നത്. റെയിൽവേയുമായി ബന്ധപ്പെട്ട മുഴുവൻ വിവരങ്ങളും ലഭ്യമാകുന്ന രീതിയിലാണ് പുതിയ ആപ്പ് പുറത്തിറക്കിയിരിക്കുന്നത്.

ടിക്കറ്റ് റിസർവേഷൻ, പ്ലാറ്റ്ഫോം ടിക്കറ്റ്, പിഎൻആർ ട്രാക്കിങ്, ട്രെയിൻ സ്റ്റാറ്റസ്, കോച്ച് പൊസിഷൻ തുടങ്ങിയ വിവിധ സേവനങ്ങൾ റെയിൽവൺ ആപ്പിൽ ലഭ്യമാണ്. ഡിജിറ്റൽ പരിഹാരങ്ങളിലൂടെ യാത്രാ സേവനങ്ങൾ ആധുനികവൽക്കരിക്കുന്നതിനും മെച്ചപ്പെടുത്തുന്നതിനുമുള്ള ദൗത്യത്തിന്റെ ഭാഗമാണ് ഈ ആപ്പ്. പ്ലേസ്റ്റോറിലും ആപ്പ്സ്റ്റോറിലും ആപ്പ് ലഭ്യമാണ്. ഇന്ത്യൻ റെയിൽവേ യാത്രക്കാർക്ക് നിലവിൽ വിവിധ സേവനങ്ങൾക്കായി ഒന്നിലധികം ആപ്പുകളും വെബ്‌സൈറ്റുകളും ഉപയോഗിക്കേണ്ടി വരാറുണ്ട്. ഇതിനു ഒരു പരിഹാരമായാണ് ഒറ്റ ആപ്പ് എന്ന ആശയം ഇപ്പോൾ യാഥാര്‍ത്ഥ്യമായിരിക്കുന്നത്.

ഐആർസിടിസിയും സെന്റർ ഫോർ റെയിൽവേ ഇൻഫർമേഷൻ സിസ്റ്റംസും ചേർന്ന് വികസിപ്പിച്ചതാണ് ഈ ആപ്ലിക്കേഷൻ. എല്ലാ റെയിൽ യാത്രക്കാർക്കും പ്രയോജനപ്പെടുത്താവുന്ന ഒരു ഔദ്യോഗിക പ്ലാറ്റ്‌ഫോമാണിത്. ആപ്പിൻ്റെ ഹോം പേജിലെ ആദ്യ നിരയിൽ റിസർവ്ഡ്, അൺറിസർവ്ഡ്, പ്ലാറ്റ്ഫോം ടിക്കറ്റുകൾ ബുക്ക് ചെയ്യാനുള്ള സൗകര്യമാണ് ഉള്ളത്. തൊട്ടുതാഴെ സേ‍ർച്ച് ട്രെയിൻ, പിഎൻആർ സ്റ്റാറ്റസ്, കോച്ച് പൊസിഷൻ, ട്രാക്ക് യുവ‍ർ ട്രെയിൻ, ഓർഡർ ഫുഡ്, ഫയൽ റീഫണ്ട്, റെയിൽ മദദ്, ട്രാവൽ ഫീഡ്ബാക്ക് എന്നീ ഐക്കണുകളുമുണ്ട്. ഓപ്പൺ ചെയ്യുമ്പോൾ തന്നെ ആപ്പിൻ്റെ ഹോം പേജിൽ ഇന്ത്യൻ റെയിൽവേയുടെ ചരിത്രവും നേട്ടങ്ങളും പറയുന്ന ചിത്രങ്ങളോട് കൂടിയ വിവരണങ്ങൾ ഉൾപ്പെടുത്തിയിട്ടുണ്ട്. ആപ്പിന്റെ ഇന്റർഫേസ് ഒന്നിലധികം ഭാഷകളിൽ ലഭ്യമാണ്