ആന്‍ഡ്രോയിഡ് ഉപകരണങ്ങളെ ബാധിക്കുന്ന മാല്‍വെയറിനെ സംബന്ധിച്ച്‌ മുന്നറിയിപ്പ്

ആന്‍ഡ്രോയിഡ് ഉപകരണങ്ങളെ ബാധിക്കുന്ന പുതിയ മാല്‍വെയറിനെ സംബന്ധിച്ച്‌ മുന്നറിയിപ്പ് നൽകി അമേരിക്കൻ ഫെഡറല്‍ ബ്യൂറോ ഓഫ് ഇന്‍വെസ്റ്റിഗേഷന്‍ (എഫ്ബിഐ). ബാഡ്ബോക്‌സ് 2.0 എന്ന ഈ മാല്‍വെയര്‍ 10 ലക്ഷത്തോളം ആന്‍ഡ്രോയിഡ് ഉപകരണങ്ങളെ ബാധിച്ചതായി എഫ്ബിഐ മുന്നറിയിപ്പ് നല്‍കുന്നു. 2023-ല്‍ ആമസോണില്‍ ലഭ്യമായ ടി95 ആന്‍ഡ്രോയിഡ് ടിവി ബോക്‌സില്‍ ആദ്യമായി ഈ മാല്‍വെയര്‍ കണ്ടെത്തിയിരുന്നു.

ചൈനീസ് നിര്‍മിത ബ്രാന്‍ഡഡ് അല്ലാത്ത ആന്‍ഡ്രോയിഡ് സ്മാര്‍ട്ട് ടിവികള്‍, സ്ട്രീമിംഗ് ബോക്‌സുകള്‍, ടാബ്‌ലെറ്റുകൾ ഐഒടി ഉപകരണങ്ങള്‍ എന്നിവയില്‍ ഈ മാല്‍വെയര്‍ മുന്‍കൂട്ടി ഇന്‍സ്റ്റാള്‍ ചെയ്ത നിലയിലാണ് വരുന്നത്. ഇതുവരെ 16 ലക്ഷം ഉപകരണങ്ങളെ ഈ മാല്‍വെയര്‍ ബാധിച്ചതായാണ് വിവരം. ഹൈസെന്‍സ്, യാന്‍ഡെക്‌സ് തുടങ്ങിയ ബ്രാന്‍ഡുകളുടെ ആന്‍ഡ്രോയിഡ് ടിവികളും ഈ മാല്‍വെയറിന്റെ പിടിയിലാണ്. ഇന്ത്യ, റഷ്യ, ചൈന, ബ്രസീല്‍, യുക്രൈന്‍, ബെലാറസ് തുടങ്ങിയ രാജ്യങ്ങളിലെ ഉപകരണങ്ങളിലാണ് ബാഡ്ബോക്‌സ് മാല്‍വെയര്‍ ഏറ്റവും കൂടുതല്‍ ബാധിച്ചിരിക്കുന്നതെന്ന് സൈബര്‍ സുരക്ഷാ സ്ഥാപനമായ ബിറ്റ്‌സൈറ്റ് വ്യക്തമാക്കി.