സഹപാഠിയുടെ വീട്ടിൽ അതിക്രമിച്ചുകയറി ശല്യം ചെയ്‌തു ; യുവാവ് അറസ്റ്റിൽ

കൊല്ലം : സഹപാഠിയുടെ വീട്ടില്‍ അതിക്രമിച്ചുകയറി സ്ഥിരമായി ബഹളമുണ്ടാക്കുന്ന യുവാവിനെ അറസ്റ്റ് ചെയ്തു. ശൂരനാട് തെക്ക് കുമരന്‍ചിറ തപസ്യയില്‍ ആദിത്യന്‍ (20) ആണ് പിടിയിലായത്.

പിടികൂടാനെത്തിയ പോലീസുകാരനെ പ്രതി ആക്രമിച്ചു.കാലൊടിഞ്ഞ സിപിഒ ശ്രീകാന്തിനെ ശാസ്താംകോട്ടയിലെ സ്വകാര്യ ആശുപത്രിയില്‍ പ്രവേശിപ്പിച്ചു.

ശൂരനാട് പോലീസ് സ്റ്റേഷന്‍ പരിധിയില്‍ കഴിഞ്ഞദിവസമാണ് സംഭവം നടന്നത്. മുൻപ് ഒപ്പം പഠിച്ച സഹപാഠിയുടെ വീട്ടിലാണ് യുവാവ് അതിക്രമം കാട്ടിയത്. ഇവിടെ അമ്മയും മകളുംമാത്രമാണ് താമസിക്കുന്നത്. രാത്രി വീടിന്റെ മതില്‍ചാടി മുകള്‍നിലയിലെത്തിയ യുവാവ് വീട്ടിലുണ്ടായിരുന്നവരെ അസഭ്യം പറയുകയും ബഹളംവയ്ക്കുകയും ചെയ്തു.

തുടര്‍ന്ന് ശൂരനാട് പോലീസെത്തി പ്രതിയെ കസ്റ്റഡിയിലെടുക്കാന്‍ ശ്രമിക്കുമ്പോഴാണ് പോലീസിനെ ആക്രമിച്ചത്. പിന്നീട് നാട്ടുകാരുടെ സഹായത്തോടെ പ്രതിയെ പോലീസ് അറസ്റ്റ് ചെയ്‌തു.കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.