രണ്ടു വയസുകാരൻ്റെ തലയിൽ സ്റ്റീൽപാത്രം കുടുങ്ങി; രക്ഷയായത് ഫയർഫോഴ്‌സ്

കണ്ണൂർ: കളിക്കുന്നതിനിടെ പാത്രത്തിൽ തല കുടുങ്ങിപ്പോയ രണ്ടു വയസുകാരന് രക്ഷയായി ഫയർഫോഴ്‌സ് ഉദ്യോഗസ്ഥർ. കുറ്റ്യാട്ടൂർ വടുവൻകുളം സ്വദേശിയായ രണ്ടു വയസുകാരൻ്റെ തലയിലാണ് കളിക്കുന്നതിനിടെ സ്റ്റീൽ കലം കുടുങ്ങിയത്. ഇന്നലെ വൈകിട്ടായിരുന്നു സംഭവം.

മട്ടന്നൂർ അഗ്നിരക്ഷാ സേനയാണ് കുട്ടിയെ രക്ഷിച്ചത്. സംഭവം നടന്ന ഉടനെ അഗ്നിരക്ഷാ സേനയെ വിവരമറിയിച്ചു. തുടർന്ന് മാതാപിതാക്കൾ കുട്ടിയെയും കൊണ്ട് അഗ്നി രക്ഷാനിലയത്തിൽ എത്തി. തുടർന്ന് പാത്രം നീക്കി കുട്ടിയെ സുരക്ഷിതമായി പുറത്തെടുക്കുകയായിരുന്നു.
കുട്ടിക്ക് കാര്യമായ പരിക്കുകൾ ഇല്ല.