പുതിയ സ്മാർട്ട്‌വാച്ച്; വാവെയ് വാച്ച് 5 പ്രോ അവതരിപ്പിക്കാനൊരുങ്ങി ചൈനീസ് കമ്പനി

പുതിയ സ്മാർട്ട്‌വാച്ച് പുറത്തിറക്കാൻ ചൈനീസ് കമ്പനി ഒരുങ്ങുന്നതായി റിപ്പോർട്ട്. വാവെയ് വാച്ച് 5 സീരീസ് എന്നാണ് ഇതിന് പേരിട്ടിരിക്കുന്നത്. മെയ് 15ന് ഈ ഉപകരണം ലോകമെമ്പാടും ലോഞ്ച് ചെയ്യുമെന്നാണ് പുതിയ റിപ്പോർട്ടുകൾ. ഈ പുതിയ വാച്ച് 5 പ്രോ കൂടുതൽ നൂതനമായ ഇസിജി സെൻസറും പുതിയ ആരോഗ്യ സവിശേഷതകളും ഉൾക്കൊള്ളുന്നതായിരിക്കും എന്നും റിപ്പോർട്ടുകൾ പറയുന്നു.

ഇത് ശരിയാണെങ്കിൽ, ഇത് വാവെയ്‌യുടെ ഇതുവരെയുള്ളതിൽ വച്ച് ഏറ്റവും ഫീച്ചർ സമ്പന്നമായ വെയറബിളുകളിൽ ഒന്നായി മാറിയേക്കാം എന്നാണ് റിപ്പോർട്ടുകൾ സൂചിപ്പിക്കുന്നത്. വെയ്‌ബോയിലെ (@RuigePlayDigital) ഒരു ചൈനീസ് ടിപ്‌സ്റ്ററാണ് വാവെയ് വാച്ച് 5 പ്രോയിൽ പുതിയതും മെച്ചപ്പെടുത്തിയതുമായ ഇലക്ട്രോകാർഡിയോഗ്രാം (ECG) സെൻസർ ഘടിപ്പിക്കുമെന്ന് സൂചന നൽകിയത്.

പോസ്റ്റ് പ്രസിദ്ധീകരിച്ചതിന് തൊട്ടുപിന്നാലെ അത് പിൻവലിക്കുകയും ചെയ്തു. പക്ഷേ ഇപ്പോഴും ആരാധകർക്കും സാങ്കേതിക വിദഗ്ദ്ധർക്കും ഇടയിൽ ഇത് കോളിളക്കം സൃഷ്ടിക്കുന്നു. ഇസിജി സവിശേഷത വാച്ചിനെ ഹൃദയത്തിന്‍റെ വൈദ്യുത സിഗ്നലുകൾ നിരീക്ഷിക്കാനും, ഏട്രിയൽ ഫൈബ്രിലേഷൻ പോലുള്ള ക്രമരഹിതമായ മിടിപ്പുകൾ കണ്ടെത്താനും, സ്റ്റാൻഡേർഡ് ഒപ്റ്റിക്കൽ ഹൃദയമിടിപ്പ് മോണിറ്ററുകളേക്കാൾ കൂടുതൽ വിശദമായ ഹൃദയാരോഗ്യ വിശകലനം നൽകാനും അനുവദിക്കുന്നു.

അതേസമയം വാവെയ് ആദ്യമായി ഇസിജി മോണിറ്ററിംഗ് അവതരിപ്പിച്ചത് അവരുടെ വാച്ച് ഡി (2021)യിലാണ്. അതിനുശേഷം, ഈ സവിശേഷത വാവെയ്‌യുടെ നിരവധി വെയറബിൾ ഉപകരണങ്ങളിൽ ലഭിച്ചിട്ടുണ്ട്. വാച്ച് 5 പ്രോ ഉപയോഗിച്ച്, വാവെയ് ഇസിജി സാങ്കേതികവിദ്യ കൂടുതൽ പരിഷ്‌‍കരിക്കുന്നതായിട്ടാണ് റിപ്പോർട്ടുകൾ. കൃത്യത മെച്ചപ്പെടുത്തുന്ന ഒരു പുതിയ ഫിംഗർടിപ്പ് ടച്ച് സെൻസർ അവതരിപ്പിക്കാനും സാധ്യതയുണ്ട്.