ആപ്പിൾ ആരാധകരുടെ ശ്രദ്ധയ്ക്ക്; ‘ഐഫോണ്‍ 17 എയര്‍’ ഡമ്മിയുടെ ദൃശ്യങ്ങൾ പുറത്ത്

ആപ്പിളിന്റെ അടുത്ത ഐഫോണ്‍ ലൈനപ്പ് എത്താന്‍ മാസങ്ങള്‍ മാത്രമേ ബാക്കിയുള്ളൂ. ഐഫോണ്‍ ശ്രേണിയില്‍ പുതിയതായെത്തുന്ന ഐഫോണ്‍ 17 എയര്‍ എന്ന മോഡലാണ് ഇത്തവണത്തെ പ്രധാന ഹൈലൈറ്റുകളിലൊന്ന്. ഫോണുമായി ബന്ധപ്പെട്ട അഭ്യൂഹങ്ങള്‍ നേരത്തെ തന്നെ പ്രചരിക്കാന്‍ തുടങ്ങിയിട്ടുണ്ടെങ്കിലും ഫോണിന്റെ ഒരു ഡമ്മി യൂണിറ്റിന്റെ ദൃശ്യങ്ങള്‍ പുറത്തുവന്നിരിക്കുകയാണിപ്പോള്‍.

അതേസമയം കഴിഞ്ഞ കുറേകാലമായി ആപ്പിള്‍ ഐഫോണുകളില്‍ പിന്തുടര്‍ന്ന് വരുന്ന രൂപകല്‍പനാശൈലി മാറ്റിപ്പിടിച്ചുകൊണ്ടാണ് ഐഫോണ്‍ 17 എയര്‍ എത്തുന്നത്. അണ്‍ബോക്‌സ് തെറാപ്പി എന്ന യൂട്യൂബ് ചാനലില്‍ യൂട്യൂബര്‍ ലൂയിസ് ഹില്‍സെന്റിഗര്‍ പുറത്തുവിട്ട വീഡിയോയില്‍ ഫോണിന് 5.65 എംഎം കനം മാത്രമേയുള്ളൂ എന്ന് വ്യക്തമാക്കുന്നു. ഐഫോണ്‍ 16-ന് 7.8 എംഎം ആണ് കനം. 2014-ല്‍ പുറത്തിറങ്ങിയ ഐഫോണ്‍ 6 ആണ് ആപ്പിള്‍ ഇതുവരെ പുറത്തിറക്കിയതില്‍ ഏറ്റവും കനം കുറഞ്ഞ ഐഫോണ്‍. 6.9 മില്ലി മീറ്റര്‍ ആണ് ഇതിന് കനമുണ്ടായിരുന്നത്. 11.6 എംഎം കനമുള്ള ആദ്യ ഐഫോണ്‍ ആണ് ഏറ്റവും കനമേറിയ ഐഫോണ്‍ മോഡല്‍.

ഐഫോണ്‍ 17 പ്രോ മോഡലിന് 8.75 മില്ലി മീറ്റര്‍ കനമുണ്ടാകുമെന്നാണ് വീഡിയോയില്‍ പറയുന്നത്. ഫ്യൂച്വറിസ്റ്റിക് എന്നാണ് ലൂയിസ് ഹില്‍സെന്റിഗര്‍ ഐഫോണ്‍ 17 എയറിനെ വിശേഷിപ്പിക്കുന്നത്. ഇതുവരെ ഐഫോണ്‍ സീരിസില്‍ ഉണ്ടായിരുന്ന പ്ലസ് മോഡലിന് പകരമായാണ് ഐഫോണ്‍ 17 എയര്‍ മോഡല്‍ എത്തുന്നത്. ഇത്രത്തോളം കനം കുറഞ്ഞ ഫോണ്‍ രൂപകല്‍പനയില്‍ കൗതുകമുയര്‍ത്തുന്നുണ്ടെങ്കിലും, ഇതിന്റെ ഗുണനിലവാരവും ഈടും നിലനിര്‍ത്താന്‍ എന്താണ് ആപ്പിള്‍ ചെയ്തിരിക്കുന്നത് എന്ന് അറിയേണ്ടതുണ്ട്. പിക്‌സല്‍ ഫോണുകള്‍ക്ക് സമാനമായ റിയര്‍ ക്യാമറ ബമ്പ് ഉള്‍പ്പെടുത്തിയാണ് പുതിയ ഐഫോണ്‍ 17 സീരീസ് വരുന്നതെന്ന റിപ്പോര്‍ട്ടുകള്‍ സ്ഥിരീകരിക്കുന്നതാണ് യൂട്യൂബര്‍ പുറത്തുവിട്ടിരിക്കുന്ന ഫോണിന്റെ ദൃശ്യങ്ങള്‍. 2025 സെപ്റ്റംബറില്‍ ഫോണ്‍ പുറത്തിറങ്ങും