അടുത്ത സീസണില്‍ ചെന്നൈ ശക്തമായി തിരിച്ചുവരും’: എം എസ് ധോണി

മുംബൈ:  ഐപിഎല്ലില്‍ മുംബൈ ഇന്ത്യന്‍സിനെതിരായ തോല്‍വിയില്‍ പ്രതികരണവുമായി ചെന്നൈ സൂപ്പര്‍ കിങ്‌സ് നായകന്‍ എം എസ് ധോണി. ‘ചെന്നൈ നേടിയ 176 എന്ന സ്‌കോര്‍ ശരാശരിയില്‍ വളരെ താഴെയായിരുന്നു. കാരണം രണ്ടാം പകുതിയില്‍ മഞ്ഞ് വരുമെന്ന് ഞങ്ങള്‍ക്കെല്ലാവര്‍ക്കും അറിയാമായിരുന്നു. മധ്യ ഓവറുകള്‍ ചെന്നൈയ്ക്ക് നന്നായി കളിക്കാന്‍ കഴിയുമായിരുന്നു.

ഇപ്പോള്‍ ക്രിക്കറ്റിലെ ഏറ്റവും മികച്ച ഡെത്ത് ബൗളര്‍മാരില്‍ ഒരാളാണ് ബുംമ്ര. മുംബൈ ഇന്ത്യന്‍സ് നേരത്തെ തന്നെ ഡെത്ത് ബൗളിങ് ആരംഭിച്ചു. അതിനൊപ്പം ചെന്നൈ നന്നായി സ്‌കോര്‍ ചെയ്യണമായിരുന്നു. വലിയ ഷോട്ടുകള്‍ ആ സമയത്ത് വരണമായിരുന്നു. കുറച്ചുകൂടി റണ്‍സ് നേടാന്‍ ചെന്നൈയ്ക്ക് കഴിയുമായിരുന്നു. കാരണം മഞ്ഞുള്ളപ്പോള്‍ 175 ഒരു ശരാശരി സ്‌കോര്‍ പോലുമല്ല.’ ധോണി മത്സരശേഷം പ്രതികരിച്ചു.

ഇത്തവണ പ്ലേ ഓഫില്‍ എത്തിയില്ലെങ്കിലും അടുത്ത സീസണില്‍ ചെന്നൈ ശക്തമായി തിരിച്ചുവരുമെന്നും ധോണി പ്രതീക്ഷ പ്രകടിപ്പിച്ചു. ‘സീസണിലെ അവശേഷിച്ച മത്സരങ്ങള്‍ പ്രധാനമാണ്. അതെല്ലാം വിജയിക്കാന്‍ ശ്രമിക്കും. പരാജയങ്ങള്‍ ഉണ്ടായാല്‍ പ്ലേ ഓഫ് സാധ്യതകള്‍ മങ്ങും. അങ്ങനെയെങ്കില്‍ അടുത്ത വര്‍ഷത്തേയ്ക്ക് മികച്ചയൊരു ടീമിനെ കളത്തിലെത്തിക്കാനാവും ശ്രമം.’ ധോണി വ്യക്തമാക്കി.