ബത്തേരിയിലെ കടയുടെ മുന്നിൽ വെച്ച ബൈക്ക് കണ്ടെടുത്തത് കർണാടകയിൽ നിന്ന്

സുൽത്താൻ ബത്തേരി: കടയുടെ മുന്നിൽ പാർക്ക് ചെയ്ത ബൈക്ക് മോഷണം പോയെന്ന് പരാതി. പോലീസ് പരിശോധനയിൽ കർണാടകയിൽ നിന്ന് ബൈക്ക് കണ്ടെടുത്ത് പോലീസ്. പ്രതിയെയും പോലീസ് കസ്റ്റഡിയിലെടുത്തു. വയനാട്ടിലെ സുൽത്താൻ ബത്തേരി കോട്ടക്കുന്നിലെ ഫുഡ് പോയി​ന്റ് എന്ന കടയുടെ മുന്നിൽ നിന്നാണ് സ്പ്ലെണ്ടർ ബൈക്ക് മോഷണം പോയത്. ഈ മാസം നാലാം തീയതി രാത്രിയോടെയാണ് സംഭവം. കർണാടക കൗദള്ളി മുസ്ലിം ബ്ലാക്ക്‌സ്ട്രീറ്റ് ഇമ്രാൻ ഖാനെയാണ് ബത്തേരി പൊലീസ് കൗദള്ളിയിൽ നിന്ന് കസ്റ്റഡിയിലെടുത്തത്.

80,000 രൂപ വില വരുന്നതായിരുന്നു മോഷണം പോയ ബൈക്ക്. ബൈക്ക് മോഷണം പോയതോടെ ഉടമ പൊലീസിൽ പരാതി നൽകി. തുടർന്ന് സി.സി.ടി.വി ദൃശ്യങ്ങളുടെ സഹായത്തോടെ പൊലീസ് നടത്തിയ അന്വേഷണത്തിലാണ് പ്രതിയെ തിരിച്ചറിഞ്ഞത്. പിന്നീട് ഇയാളെ തേടി അന്വേഷണ സംഘം കർണാടകയിലെത്തി. ഇവിടെ നിന്നും പ്രതിയെയും ബൈക്കും കസ്റ്റഡിയിലെടുക്കുകയായിരുന്നു. എസ്.ഐ അബ്ദുൽ റസാഖ്, സീനിയർ സിവിൽ പൊലീസ് ഓഫീസർ രജീഷ്, സിവിൽ പൊലീസ് ഓഫീസർമാരായ അജിത്‌, പ്രിവിൻ ഫ്രാൻസിസ്, ഡ്രൈവർ ലബ്‌നാസ് എന്നിവരാണ് പ്രതിയെ പിടികൂടിയത്. ഇയാളെ നാളെ കോടതിയിൽ ഹാജരാക്കുമെന്ന് പൊലീസ് പറഞ്ഞു.