ടൂറിസം രംഗത്ത് പുതിയ ഉയരങ്ങൾ കീഴടക്കി സൗദി അറേബ്യ

ടൂറിസം രംഗത്ത് പുതിയ ഉയരങ്ങൾ കീഴടക്കി സൗദി അറേബ്യ. ടൂറിസം മന്ത്രാലയം പുറത്തുവിട്ട കണക്കുകൾ പ്രകാരം, 2024-ൽ സ്വകാര്യ ടൂറിസം സൗകര്യങ്ങൾക്കുള്ള ലൈസൻസുകളുടെ എണ്ണത്തിൽ 330 ശതമാനം വർധനവാണ് രേഖപ്പെടുത്തിയിരിക്കുന്നത്. 2023-ൽ 1,900 ലൈസൻസുകൾ മാത്രമുണ്ടായിരുന്നത് 2024 ആയപ്പോഴേക്കും 8,300 ആയി ഉയർന്നു. ഇത് രാജ്യത്തെ ടൂറിസം മേഖലയിലെ വലിയ വികാസത്തെയും നിക്ഷേപത്തിനുള്ള വർധിച്ച ആവശ്യകതയെയും സൂചിപ്പിക്കുന്നു.

സൗദിയുടെ വിവിധ ഭാഗങ്ങളിൽ ടൂറിസ്റ്റുകൾക്കുള്ള സൗകര്യങ്ങൾ ഗണ്യമായി വർധിച്ചിട്ടുണ്ട്. 2024-ൽ ലൈസൻസുള്ള ടൂറിസ്റ്റ് സൗകര്യങ്ങളുടെ എണ്ണം 4,425 ആയി ഉയർന്നു. ഇത് മുൻ വർഷത്തെ അപേക്ഷിച്ച് 89 ശതമാനം വളർച്ചയാണ് കാണിക്കുന്നത്. റിയാദ്, ജിദ്ദ, മക്ക, മദീന തുടങ്ങിയ പ്രധാന നഗരങ്ങളിൽ സന്ദർശകരുടെ എണ്ണം വർധിച്ചു. കൂടാതെ, അസീർ, അൽബഹ, ജിസാൻ, റെഡ് സീ, നിയോം തുടങ്ങിയ പ്രകൃതിരമണീയമായ പ്രദേശങ്ങളും ഇപ്പോൾ ടൂറിസ്റ്റുകളുടെ ഇഷ്ട കേന്ദ്രങ്ങളായി മാറിക്കൊണ്ടിരിക്കുകയാണ്. ഈ പ്രദേശങ്ങളുടെ പ്രകൃതി ഭംഗിയും ചരിത്രപരമായ പ്രാധാന്യവും ലോകമെമ്പാടുമുള്ള സഞ്ചാരികളെ ആകർഷിക്കുന്നു.