വീണ്ടും തൊഴിലാളികളെ പിരിച്ചുവിട്ട് ഗൂഗിൾ

വാഷിങ്ടണ്‍: നൂറുകണക്കിന് തൊഴിലാളികളെ പിരിച്ചുവിട്ട് ഗൂഗിള്‍. ഡിവൈസ് യൂണിറ്റായ ആന്‍ഡ്രോയിഡ് സോഫ്റ്റ്വെയര്‍, പിക്‌സല്‍ ഫോണുകള്‍, ക്രോം ബ്രൗസര്‍ എന്നിവയില്‍ ജോലി ചെയ്യുന്നവരെയാണ് പിരിച്ചുവിട്ടതെന്നാണ് റിപ്പോര്‍ട്ട്. ജനുവരിയില്‍ ഈ യൂണിറ്റിലെ ജോലിക്കാര്‍ക്ക് വോളണ്ടറി എക്‌സിറ്റ് ഓഫര്‍ നല്‍കിയതിന് ശേഷമാണ് ലേ ഓഫ് നടത്തുന്നതെന്നാണ് ദി ഇന്‍ഫര്‍മേഷന്റെ റിപ്പോര്‍ട്ടില്‍ പറയുന്നത്. കഴിഞ്ഞ വര്‍ഷം പ്ലാറ്റ്‌ഫോം ഡിവൈസ് ടീമുകളില്‍ ആളുകളെ ചരുക്കി ഫലപ്രദമായി പ്രവര്‍ത്തിക്കാന്‍ ഞങ്ങള്‍ ശ്രമിച്ചു.

ഇതിനായി ജനുവരിയില്‍ വോളന്ററി എക്‌സിറ്റ് പ്രോഗ്രാം അവതരിപ്പിച്ചിരുന്നു. ഇതിന് പുറമേ ചില ലേ ഓഫുകള്‍ കൂടി ഞങ്ങള്‍ നടത്തി- എന്ന് ഗൂഗിള്‍ സ്‌പോക്ക്‌പേഴ്‌സണ്‍ പറഞ്ഞതായും റിപ്പോര്‍ട്ട് വ്യക്തമാക്കുന്നു. ഫെബ്രുവരിയില്‍ ഗൂഗിളിന്റെ ക്ലൗഡ് ഡിവിഷനിലും ലേ ഓഫുകള്‍ നടന്നിരുന്നു. എന്നാല്‍ ചില ടീമുകളെ മാത്രമായിരുന്നു ഇത് ബാധിച്ചത്. 2023 ജനുവരിയില്‍ ഗൂഗിള്‍ 12,000 തൊഴില്‍ ഒഴിവാക്കാനുള്ള പദ്ധതി പ്രഖ്യാപിച്ചിരുന്നതായും റിപ്പോര്‍ട്ടുകള്‍ ഉണ്ട്. ഇത് ആഗോള തൊഴിലാളികളുടെ 6 ശതമാനമാണെന്നാണ് കണക്ക്.