ഐപിഎല്ലിന്റെ ചരിത്രത്തിലാദ്യം; ബാറ്റിംഗില്‍ മറ്റൊരു നാഴികക്കല്ലുകൂടി പിന്നിട്ട് കിങ് കോഹ്ലി

ബെംഗളൂരു: ബാറ്റിംഗില്‍ മറ്റൊരു നാഴികക്കല്ലുകൂടി പിന്നിട്ട് വിരാട് കോഹ്ലി. ഐപിഎല്ലിന്റെ ചരിത്രത്തിലാദ്യമായി 1000 ബൗണ്ടറികള്‍ നേടുന്ന താരമായി മാറിയിരിക്കുകയാണ് കോഹ്ലി. ഐപിഎല്ലിന്റെ എല്ലാ സീസണുകളും കളിച്ച കോഹ്ലി ഇതുവരെ 257 മത്സരങ്ങളാണ് കളിച്ചത്. 721 ഫോറും 279 സിക്‌സും താരത്തിന്റെ ബാറ്റില്‍ നിന്ന് ഐപിഎല്ലില്‍ പിറന്നു.

ഡല്‍ഹിക്കെതിരായ മത്സരത്തിലെ നാലാം ഓവറിലെ മൂന്നാം പന്തിലായിരുന്നു കോഹ്ലി നാഴികക്കല്ല് പിന്നിട്ടത്. ഡല്‍ഹി നായകന്‍ അക്‌സര്‍ പട്ടേലെറിഞ്ഞ പന്ത് സിക്‌സര്‍ അടിച്ചാണ് നേട്ടം. ലീഗില്‍ ഏറ്റവുമധികം ഫോറുകള്‍ നേടിയ താരമാണ് കോഹ്ലിയെങ്കിലും സിക്‌സിന്റെ കാര്യത്തില്‍ പിന്നിലാണ്. ക്രിസ് ഗെയിലും (357) രോഹിത് ശര്‍മയുമാണ് (282) കോഹ്ലിയേക്കാള്‍ സിക്‌സുകള്‍ ഐപിഎല്ലില്‍ നേടിയിട്ടുള്ളത്.

വരും മത്സരങ്ങളില്‍ മറ്റൊരു അപൂര്‍വ്വ റെക്കോര്‍ഡുകൂടി കോഹ്ലിയെ കാത്തിരിക്കുന്നുണ്ട്. ട്വന്റി 20 ക്രിക്കറ്റില്‍ 100 അര്‍ദ്ധ സെഞ്ച്വറികള്‍ നേടുന്ന രണ്ടാമത്തെ താരമാകാന്‍ കോഹ്ലിക്ക് കഴിയും. നിലവില്‍ 99 അര്‍ദ്ധ സെഞ്ച്വറികളാണ് കോഹ്ലിയുടെ പേരിലുള്ളത്. ഡേവിഡ് വാര്‍ണറാണ് ട്വന്റി 20യില്‍ 100 അര്‍ദ്ധ സെഞ്ച്വറി നേടിയിട്ടുള്ള ഏകതാരം.