ചെറിയ കാറ്റിനെ വിഴുങ്ങുന്ന വലിയ കാറ്റ് ; കൗതുക ദൃശ്യങ്ങൾ പകർത്തി നാസ

കാലിഫോര്‍ണിയ: ചൊവ്വ ഗ്രഹത്തിലെ അന്തരീക്ഷത്തെ കുറിച്ച് പഠനം തുടരുന്ന നാസയുടെ പെര്‍സിവറന്‍സ് റോവര്‍ പകര്‍ത്തിയ പുതിയ ദൃശ്യങ്ങള്‍ ശാസ്ത്രലോകത്തിന് കൗതുകവും ആവേശവും നല്‍കുന്നു. ചൊവ്വയുടെ ഉപരിതലത്തില്‍ വച്ച് കുഞ്ഞന്‍ ‘ഡെസ്റ്റ് ഡെവിള്‍’ (Dust Devil) കാറ്റിനെ വിഴുങ്ങുന്ന ഭീമന്‍
ഡെസ്റ്റ് ഡെവിള്‍ കാറ്റിന്റെ ദൃശ്യങ്ങളാണ് പെര്‍സിവറന്‍സ് റോവര്‍ പുറത്തുവിട്ടത്. ചൊവ്വയിലെ അന്തരീക്ഷ പ്രതിഭാസങ്ങളെ കുറിച്ച് ശാസ്ത്രജ്ഞര്‍ക്ക് കൂടുതല്‍ സൂചനകള്‍ നല്‍കുന്നതാണ് ഈ വീഡിയോ.

ഇതിലെ വലിയ കാറ്റിന് ഏകദേശം 65 മീറ്റര്‍ അഥവാ 210 അടി വിസ്തീര്‍ണമുണ്ടായിരുന്നു, ചെറിയ കാറ്റിന് 5 മീറ്റര്‍ അഥവാ 16 അടിയായിരുന്നു വീതി. ഇതിലെ ചെറിയ കാറ്റ് വലിയ കാറ്റിന്റെ കരവലയത്തില്‍പ്പെട്ട് ഇല്ലാതാകുന്ന അവിശ്വസനീയ കാഴ്ചകളാണ് പെര്‍സിവറന്‍സ് റോവറിലെ ക്യാമറ പകര്‍ത്തിയത്.

ഡെസ്റ്റ് ഡെവിള്‍ കാറ്റുകള്‍ എന്നാല്‍ എന്താണ് ?

ചുഴലിക്കാറ്റുകള്‍ക്കോ ടോര്‍ണഡോകള്‍ക്കോ സമാനമായിട്ടുള്ളതും എന്നാല്‍ അത്ര അപകടകരമല്ലാത്തതുമായ കാറ്റുകളാണ് ഡെസ്റ്റ് ഡെവിള്‍ കാറ്റുകള്‍. ചൂടുള്ള ഉപരിതലത്തില്‍ നിന്നുള്ള വായു പെട്ടെന്ന് ഉയര്‍ന്ന് മുകളിലുള്ള തണുത്ത വായുവുമായി കൂടിച്ചേരുമ്പോഴാണ് ഇത്തരം കാറ്റുകള്‍ ഉണ്ടാകുന്നത്. ശൂന്യപ്രദേശങ്ങളില്‍ പൊടി ഉയര്‍ത്തിപ്പറത്തിക്കൊണ്ട് ചുറ്റിത്തിരിയുന്ന ഈ കാറ്റുകള്‍ കാഴ്ചയ്ക്ക് ആകര്‍ഷകമായി തോന്നാം.

ചൊവ്വയിലെ അന്തരീക്ഷ പ്രവണതകളെ മനസിലാക്കുന്നതിനായി ശാസ്ത്രജ്ഞര്‍ ഈ കാറ്റുകള്‍ കൂടുതല്‍ നിരീക്ഷിക്കുന്നുണ്ട്. 2012-ല്‍ നാസയുടെ MRO പകര്‍ത്തിയ ദൃശ്യങ്ങള്‍ക്കനുസരിച്ച്, 210 അടി വീതിയുള്ളതും 12 മൈല്‍ ഉയരമുള്ളതുമായ ഒരു വലിയ ചുഴലിക്കാറ്റ് ചൊവ്വയില്‍ പ്രത്യക്ഷപ്പെട്ടിരുന്നു. അതിനോട് സാമ്യമുള്ള കാഴ്ചകളാണ് ഇപ്പോഴത്തെ ദൃശ്യങ്ങള്‍ നല്‍കുന്നത്. ചൊവ്വയിലെ ഉപരിതലത്തില്‍ വച്ച് നിരവധി ഡെസ്റ്റ് ഡെവിള്‍ കാറ്റുകള്‍ തമ്മില്‍ ലയിക്കുന്നത് ശാസ്ത്രലോകത്തിന് ഇപ്പോഴും അതിശയകരമായ ഒരു രഹസ്യമാണ്.

ഭൂമിയിലും ചൊവ്വയിലും ഡെസ്റ്റ് ഡെവിള്‍ കാറ്റുകള്‍ രൂപംകൊള്ളാറുണ്ട്. എന്നാല്‍ രണ്ടിടത്തും അവയുടെ സ്വഭാവം വ്യത്യസ്തമാണ്. ഭൂമിയിലെ കാറ്റുകള്‍ വളരെ ചെറുതും കുറഞ്ഞ ദൈര്‍ഘ്യം ഉള്ളതുമായിരിക്കും, സാധാരണയായി ഏതാനും സെക്കന്‍ഡുകള്‍ മുതല്‍ കുറച്ച് മിനിറ്റുകള്‍ വരെ മാത്രമേ അവ നിലനില്‍ക്കുന്നുള്ളൂ. എന്നാല്‍ ചൊവ്വയില്‍ ഡെസ്റ്റ് ഡെവിള്‍ കാറ്റുകള്‍ താരതമ്യേന വിശാലവും ശക്തവുമാണ്. ചിലപ്പോഴൊക്കെ 10 മിനിറ്റിനും അതിലധികം നേരവും അവ സജീവമായി നിലനില്‍ക്കാറുണ്ട്.

പെഴ്സിവിയറന്‍സ് റോവര്‍ ഇപ്പോള്‍ ജെസെറോ ഗര്‍ത്തത്തിലാണ് (Jezero Crater) പര്യവേഷണത്തിലുള്ളത്. 2020 ജൂലൈ 30-ന് വിക്ഷേപിച്ച ശേഷം ഏഴ് മാസം കൊണ്ട് 48 കോടി കിലോമീറ്റര്‍ സഞ്ചരിച്ചാണ് ഈ റോവര്‍ ചൊവ്വയിലെത്തിയത്. ചൊവ്വയിലെത്തുന്ന അഞ്ചാമത്തെ റോവറായ പെര്‍സിവറന്‍സിന് മുമ്പ്, Sojourner, Opportunity, Spirit, Curiosity എന്നീ റോവറുകള്‍ ചൊവ്വയില്‍ ഇറങ്ങിയിരുന്നു.

ജെസെറോ ഗര്‍ത്തം ഒരു കാലത്ത് ഒരു വലിയ തടാകമായിരുന്നെന്നാണ് ശാസ്ത്രജ്ഞരുടെ നിഗമനം. ഒരു കാലത്ത് ഇവിടെ നദികള്‍ ഒഴുകിയിരുന്നതായും അവയുടെ ജലപ്രവാഹം ചൊവ്വയുടെ പുരാതന കാലത്ത് ജീവന്‍ നിലനില്ക്കാന്‍ അനുകൂലമായ സാഹചര്യങ്ങള്‍ ഉണ്ടായിരുന്നിരിക്കാം എന്നുമാണ് ഗവേഷകരുടെ അനുമാനം. ഈ പ്രദേശത്തെ മണ്ണില്‍ ചെളിയുടെ അംശം കൂടുതലാണ്, ഇത് ജലസാന്നിധ്യത്തിന്റെ തെളിവായി കണക്കാക്കപ്പെടുന്നു. ഇവിടെ നിന്ന് പഴയകാല ജീവന്റെ സൂക്ഷ്മഫോസിലുകള്‍ കണ്ടെത്താനാകുമോ എന്നതും പെര്‍സിവറന്‍സ് റോവറിന്റെ പ്രധാന ഗവേഷണ ലക്ഷ്യങ്ങളിലൊന്നാണ്.