കാര്‍ത്തി ചിത്രം സര്‍ദാര്‍ 2ൽ നിന്ന് യുവൻ പിന്മാറി; ഇനി പുതിയ സംഗീത സംവിധായകന്‍ ?

കാര്‍ത്തി നായകനായി അണിയറയില്‍ ഒരുങ്ങുന്ന ചിത്രമാണ് സര്‍ദാര്‍ 2. സിനിമയില്‍ സംഗീത സംവിധായകന്‍ യുവന്‍ ശങ്കര്‍ രാജ സംഗീതം നല്‍കുമെന്നാണ് നേരത്തെ വാര്‍ത്തകള്‍ വന്നിരുന്നത്. എന്നാല്‍, ഈ ചിത്രത്തില്‍ നിന്ന് യുവന്‍ പിന്മാറിയതായുള്ള റിപ്പോര്‍ട്ടുകളാണ് ഇപ്പോള്‍ പുറത്ത്‌വരുന്നത്. സാം സി എസ് പകരം സംഗീതം നല്‍കും എന്നാണ് ഒടിടി പ്ലേ റിപ്പോര്‍ട്ട് ചെയ്യുന്നത്. കാര്‍ത്തിയുടെ ഹിറ്റ് ചിത്രമായ കൈതിക്ക് സംഗീതം നല്‍കിയത് സാം സി എസ് ആയിരുന്നു.

2022ല്‍ പുറത്തിറങ്ങി വലിയ വിജയം നേടിയ സര്‍ദാര്‍ എന്ന സിനിമയുടെ രണ്ടാം ഭാഗമാണിത്. പിഎസ് മിത്രന്‍ തന്നെയാണ് സര്‍ദാര്‍ 2 വിന്റെയും സംവിധായകന്‍. ചിത്രത്തിന്റെ ഷൂട്ടിംഗ് ഇപ്പോള്‍ ചെന്നൈയില്‍ പുരോഗമിക്കുകയാണ്. സര്‍ദാര്‍ ആദ്യഭാഗത്തിന് സംഗീതം നല്‍കിയത് ജിവി പ്രകാശ് കുമാറായിരുന്നു.
സര്‍ദാര്‍ 2 വില്‍ എസ്‌ജെ സൂര്യയാണ് കാര്‍ത്തിയുടെ വില്ലനായി എത്തുന്നതെന്നാണ് റിപ്പോര്‍ട്ടുകള്‍. സര്‍ദാര്‍ 2വില്‍ മാളിവിക മോഹനന്‍ നായികയായി എത്തും. കാര്‍ത്തി ആദ്യചിത്രത്തിലെ പോലെ തന്നെ ഇരട്ട വേഷത്തിലാകും എത്തുക. എസ് ലക്ഷ്മണ്‍ കുമാര്‍ നിര്‍മ്മാതാവും എ വെങ്കിടേഷ് സഹനിര്‍മ്മാതാവുമായ ചിത്രത്തിന് ജോര്‍ജ്ജ് സി വില്യംസാണ് ഛായാഗ്രാഹകന്‍. ചിത്രസംയോജനം: വിജയ് വേലുക്കുട്ടി.