കേരള സര്‍ക്കിളില്‍ ഏഴ് ലക്ഷം എഫ്‌ടിടിഎച്ച് കണക്ഷന്‍; മികച്ച നേട്ടവുമായി ബിഎസ്എന്‍എല്‍

തിരുവനന്തപുരം: കേരള സര്‍ക്കിളില്‍ ഏഴ് ലക്ഷം എഫ്‌ടിടിഎച്ച് (ഭാരത് ഫൈബര്‍) ബ്രോഡ്‌ബാന്‍ഡ് ഇന്‍റര്‍നെറ്റ് കണക്ഷനുകള്‍ പൂര്‍ത്തിയാക്കി ബിഎസ്എന്‍എല്‍. രാജ്യത്തെ ഏറ്റവും വലിയ മൂന്നാമത്തെ ഫൈബര്‍ ബ്രോ‍ഡ്‌ബാന്‍ഡ് സര്‍വീസ് സേവനദാതാക്കളാണ് ബിഎസ്എന്‍എല്‍. ബിഎസ്എന്‍എല്ലിന്‍റെ ഫൈബര്‍-ടു-ദി-ഹോം സേവനമാണ് ബിഎസ്എന്‍എല്‍ എഫ്‌ടിടിഎച്ച്, ഭാരത് ഫൈബര്‍ എന്നീ പേരുകളില്‍ അറിയപ്പെടുന്നത്. ഫൈബര്‍ ഒപ്റ്റിക് സാങ്കേതികവിദ്യയിലൂടെ ഹൈ-സ്‌പീഡ് ഇന്‍റര്‍നെറ്റും മറ്റ് കണക്റ്റിവിറ്റി സൗകര്യങ്ങളുമാണ് ഭാരത് ഫൈബര്‍ വാഗ്ദാനം ചെയ്യുന്നത്.

കോപ്പര്‍-അധിഷ്ഠിത കണക്റ്റിവിറ്റിയുമായി താരതമ്യം ചെയ്യുമ്പോള്‍ ഇന്‍റര്‍നെറ്റ് കണക്ഷന് കൂടുതല്‍ വേഗതയും സ്ഥിരതയും നൽകുന്നതാണ് ഫൈബര്‍ ഒപ്റ്റിക് കേബിളുകള്‍. ബിഎസ്എന്‍എല്‍ എഫ്‌ടിടിഎച്ച് 2 എംബിപിഎസ് മുതല്‍ 300 എംബിപിഎസ് വരെ വേഗം പ്ലാനുകള്‍ അനുസരിച്ച് നല്‍കുന്നുണ്ട്. വോയിസ് ടെലിഫോണി, ഐപിടിവി സേവനങ്ങളും ഭാരത് ഫൈബര്‍ വഴി ബിഎസ്എന്‍എല്‍ ബ്രോഡ്‌ബാന്‍ഡ് ഉപയോക്താക്കള്‍ക്ക് നല്‍കുന്നുണ്ട്.