135 കോടി നേടിയോ; മാളികപ്പുറം’ ചിത്രത്തിന്‍റെ യഥാര്‍ഥ കളക്ഷന്‍ വെളിപ്പെടുത്തി നിര്‍മ്മാതാവ്

മാളികപ്പുറം ചിത്രത്തിന്‍റെ യഥാര്‍ഥ കളക്ഷന്‍ ഇപ്പോൾ വെളിപ്പെടുത്തിയിരിക്കുകയാണ് നിര്‍മ്മാതാവ് വേണു കുന്നപ്പിള്ളി. കൂടാതെ മാമാങ്കം എന്ന ചിത്രം 135 കോടി നേടിയതായി പോസ്റ്റര്‍ ഇറക്കാനുണ്ടായ സാഹചര്യം നിര്‍മ്മാതാവ് വേണു കുന്നപ്പിള്ളി അടുത്തിടെ പറഞ്ഞിരുന്നു. ഇപ്പോഴിതാ അദ്ദേഹം നിര്‍മ്മിച്ച മറ്റൊരു ചിത്രത്തിന്‍റെ യഥാര്‍ഥ കളക്ഷന്‍ കണക്കും പങ്കുവച്ചിരിക്കുകയാണ്. ഉണ്ണി മുകുന്ദനെ നായകനാക്കി വിഷ്ണു ശശിശങ്കര്‍ സംവിധാനം ചെയ്ത മാളികപ്പുറം എന്ന ചിത്രത്തെക്കുറിച്ചാണ് അദ്ദേഹം ഇപ്പോൾ പറഞ്ഞിരിക്കുന്നത്.

ചിത്രം തിയറ്ററുകളില്‍ പ്രദര്‍ശിപ്പിക്കുന്ന സമയത്ത് അത് 100 കോടി ക്ലബ്ബില്‍ ഇടംപിടിച്ചതായി ഒഫീഷ്യല്‍ പോസ്റ്റര്‍ ഇറങ്ങിയിരുന്നു. ഉണ്ണി മുകുന്ദന്‍റെ ആദ്യ 100 കോടി ക്ലബ്ബ് ചിത്രമെന്ന നിലയിലാണ് ആ സമയത്ത് റിപ്പോര്‍ട്ട് വന്നിരുന്നത്. എന്നാല്‍ ഇപ്പോഴിതാ മാളികപ്പുറം 100 കോടി നേടിയിട്ടില്ലെന്നാണ് നിര്‍മ്മാതാവ് വേണു കുന്നപ്പിള്ളി പറയുന്നത്. ജിഞ്ചര്‍ മീഡിയ എന്‍റര്‍ടെയ്ന്‍‍മെന്‍റ്സിന് നല്‍കിയ അഭിമുഖത്തിലാണ് ചിത്രത്തിൻ്റെ കളക്ഷനെക്കുറിച്ച് പറയുന്നത്. നൂറ് കോടി ഒന്നും വന്നില്ല. 75 കോടിയാണ് ലഭിച്ചത്. എന്നാണ് അദ്ദേഹം അഭിമുഖത്തിൽ പറഞ്ഞത്.

അതേസമയം അദ്ദേഹത്തിൻ്റെ തന്നെ നിര്‍മ്മാണത്തില്‍ എത്തിയ 2018 എന്ന ചിത്രത്തിന്‍റെ നേട്ടവും ഇതേ അഭിമുഖത്തില്‍ പറയുന്നുണ്ട്- 2018 ന് തിയറ്റര്‍ കളക്ഷനും ഒടിടിയും സാറ്റലൈറ്റും എല്ലാം ചേര്‍ന്ന് ആകെ 200 കോടിക്ക് മുകളില്‍ ലഭിച്ചിരുന്നു. അന്നൊക്കെ ഒടിടി, സാറ്റലൈറ്റ് റൈറ്റുകള്‍ക്ക് നല്ല ഡിമാന്‍ഡ് ഉണ്ടായിരുന്നുവെന്നും വേണു കുന്നപ്പിള്ളി പറഞ്ഞു.