രാജമൗലിയുടെ പുതിയ ബിഗ് ബജറ്റ് ചിത്രത്തിന്റെ നിര്‍ണ്ണായക രംഗം ലീക്കായി

ഇന്ത്യന്‍ സിനിമ ആകാംക്ഷയോടെ ഉറ്റുനോക്കുന്ന ചിത്രമാണ് രാജമൗലി-മഹേഷ് ബാബു ചിത്രം എസ്.എസ്.എം.ബി 29. ചിത്രത്തിനായി ഒരു വര്‍ഷത്തോളം നീണ്ടു നിന്ന പ്രീ പ്രൊഡക്ഷനായിരുന്നു രാജമൗലി നടത്തിയത്. എസ്എസ്എംബി 29 എന്ന് താല്‍ക്കാലികമായി പേരിട്ടിരിക്കുന്ന ചിത്രത്തില്‍ മറ്റൊരു പ്രധാന കഥാപാത്രത്തെ അവതരിപ്പിക്കുന്നത് പൃഥ്വിരാജ് സുകുമാരന്‍ ആണ്. ഇപ്പോഴിതാ സംവിധായകനെയും സംഘത്തെയും ഞെട്ടിച്ച ഒരു വിഷയം സിനിമയുടെ സെറ്റില്‍ നിന്ന് സംഭവിച്ചിരിക്കുകയാണ്.

സിനിമയുടെ ചിത്രീകരണത്തിനിടയിലെ ഒരു ലൊക്കേഷന്‍ വീഡിയോ ചോര്‍ന്നിരിക്കുകയാണ്. മഹേഷ് ബാബുവിനൊപ്പം വീഡിയോയില്‍ ഉള്ളത് പൃഥ്വിരാജ് ആണെന്നാണ് കരുതപ്പെടുന്നത്. ചിത്രത്തിലെ ഒരു പ്രധാന രംഗമെന്ന് വിലയിരുത്തപ്പെടുന്ന സീനില്‍ ഒരു കഥാപാത്രത്തെക്കുറിച്ചുള്ള ചില നിര്‍ണ്ണായക വിവരങ്ങളും കമ്യൂണിക്കേറ്റ് ചെയ്യുന്നുണ്ട്. ലൊക്കേഷനില്‍ത്തന്നെയുള്ള ഒരു വാഹനത്തില്‍ നിന്ന് മൊബൈല്‍ ഫോണ്‍ ക്യാമറയില്‍ ചിത്രീകരിച്ചതാണ് ഈ രംഗം.

സയന്‍സ് ഫിക്ഷന്‍ അഡ്വഞ്ചര്‍ സ്വഭാവത്തിലൊരുങ്ങുന്ന ചിത്രത്തിന് 1000 കോടി രൂപ മുതല്‍മുടക്ക് വരുമെന്നാണ് റിപ്പോര്‍ട്ടുകള്‍. മഹേഷ് ബാബുവിനും പൃഥ്വിരാജ് സുകുമാരനും ഒപ്പം ജോണ്‍ ഏബ്രഹാമും പ്രിയങ്ക ചോപ്രയും ചിത്രത്തില്‍ സുപ്രധാന വേഷങ്ങളില്‍ എത്തുന്നുണ്ട്.

2026 അവസാനത്തോടെ റിലീസ് തീരുമാനിച്ചിരിക്കുന്ന ssmb29ന് നിലവില്‍ പേരിട്ടിട്ടില്ല. ഹൈദരാബാദില്‍ വാരണാസിയിലെ ഗോപുരങ്ങളുടെ മാതൃകയില്‍ നിര്‍മ്മിച്ചിരിക്കുന്ന കൂറ്റന്‍ സെറ്റിന്റെ ചിത്രങ്ങളും അടുത്തിടെ ലീക്കായിരുന്നു. ഇന്ത്യാന ജോണ്‍സ് ചിത്രങ്ങളുടെ ശക്തമായ സ്വാധീനം ചിത്രത്തിനുണ്ടാകും എന്നാണ് എസ്.എസ് രാജമൗലി ചില അഭിമുഖങ്ങളില്‍ പറഞ്ഞത്