എഴുപുന്ന ശ്രീകൃഷ്ണപുരം ക്ഷേത്രക്കുള നവീകരണ പ്രവർത്തനങ്ങൾക്ക് തുടക്കം

പട്ടണക്കാട് ബ്ലോക്ക് പഞ്ചായത്ത് പദ്ധതിയിൽ ഉൾപ്പെടുത്തി എഴുപുന്ന ശ്രീകൃഷ്ണപുരം ക്ഷേത്രക്കുളം കല്ലുകെട്ടി സംരക്ഷിക്കുന്ന പദ്ധതി ആരംഭിച്ചു. അഞ്ചു ലക്ഷം രൂപ മുടക്കി കരിങ്കൽ ഭിത്തി കെട്ടിയാണ് കുളം സംരക്ഷിക്കുന്നത്. ശ്രീകൃഷ്ണപുരം ക്ഷേത്രത്തിലെ ആറാട്ട് നടത്തുന്ന പ്രധാനപ്പെട്ട കുളമാണിത്. ക്ഷേത്രക്കുളങ്ങൾ സംരക്ഷിക്കുന്നത് പൊതു കുളങ്ങൾ സംരക്ഷിക്കുന്നത് പോലെ തന്നെയാണ് എന്നുള്ളതുകൊണ്ടാണ് ബ്ലോക്ക് പഞ്ചായത്ത് ഈ പദ്ധതി ഏറ്റെടുത്തത്. പട്ടണക്കാട് ബ്ലോക്ക് പഞ്ചായത്ത് പ്രസിഡൻറ് മേരി ടെൽഷ്യ നിർമ്മാണ ഉദ്ഘാടനം നിർവഹിച്ചു. ബ്ലോക്ക് പഞ്ചായത്ത് വൈസ് പ്രസിഡൻറ് ആർ ജീവൻ അധ്യക്ഷത വഹിച്ചു. ഗ്രാമപഞ്ചായത്ത് അംഗം ഇ കെ പ്രവീൺ സ്വാഗതം ആശംസിച്ചു. ശ്രീകൃഷ്ണപുരം ക്ഷേത്ര ദേവസ്വം പ്രസിഡൻറ് പി കെ അശോകൻ,സെക്രട്ടറി രജിത അനിൽ എന്നിവർ ആശംസകൾ അർപ്പിച്ചു.